ساياساتتانۋشى "ميتينگىلەر تۋرالى"، "ساياسي پارتيالار تۋرالى، "ب ا ق تۋرالى، "سايلاۋ تۋرالى، "پارلامەنت تۋرالى"، جەرگىلىكتى باسقارۋ تۋرالى" زاڭداردى قايتا قاراۋ، تولىقتىرىپ، سىن-ەسكەرتپەلەردى ەسكەرىپ تولىقتىرۋ قاجەتتىگىن ايتتى.

ايتالىق، ميتينگىلەر تۋرالى زاڭعا قاتىستى ازاماتتارعا ءوز قۇقىعىن ايتۋعا مۇمكىندىك بەرۋ، وعان كەدەرگى كەلتىرمەۋ، حالىقارالىق ستاندارتقا ساي قىلۋ ۇسىنىلسا، پارتيا تۋرالى زاڭعا پارتيا قۇرۋعا كەدەرگى كەلتىرەتىن زاڭنامالىق توسقاۋىلداردى ازايتۋ قاجەتتىگى ايتىلدى.

سايلاۋ تۋرالى زاڭعا قاتىستى ساياسي توپ سايلاۋدىڭ ارالاس جۇيەسىنە كوشۋ پىكىرىن ءبىلدىردى. پارلامەنت تۋرالى زاڭعا زاڭ شىعارۋشى ورگانعا ءوتۋ تابالدىرىعىن تومەندەتۋ، پارلامەنتتىك وپپوزياعا مۇمكىندىك بەرۋ، پارلامەنتتىڭ اشىقتىعى پەن جاۋاپكەرلىگىن ارتتىرۋ ماسەلەلەرى كوتەرىلدى.

– بىرىمىزگە ۇناسىن-ۇناماسىن، ءدال وسى كەزگە ساياسي مودەرنيزاسيا، ساياسي رەفورما دەگەن ماسەلەلەرگە قاتىستى ناقتى قوعامدىق پىكىر قالىپتاستى. جۇمىس توبى بارشا جۇمىستى، ايتىلعان پىكىردى زەردەلەي كەلە ساياسي ماسەلەلەر ەلىمىزدە قابىلدانعان جيىرما ەكى زاڭعا قاتىستى ەكەنىنە كوزىن جەتكىزدى. الايدا، وسى كەزگە دەيىنگى بارشا داۋ-داماي ساياسي ۇدەرىستەردى، ولاردىڭ باستى ەرەجەسىن انىقتايتىن بەس-التى زاڭنىڭ توڭىرەگىنە توپشىلانعانىن دا جوققا شىعارا المايمىز.

ءبىزدىڭ ۇسىنىستاردىڭ باستى باعىتى – ەلدەگى ساياسي ۇدەرىستەردى دەموكراتيزاسيالاۋ، زاڭنامانى ۇلت مۇددەسىنە ساي ىرىقتاندىرىپ، ليبەراليزاسيالاۋ، بيلىك تارماقتارى اراسىنداعى قارىم-قاتىناستارداعى تەڭسىزدىكتى جويۋ، قوعام تىنىسىن اشىپ، حالىق پەن بيلىك اراسىن جاماۋ بولىپ تابىلادى.

جۇمىس توبى جۇرگىزگەن مونيتورينگ، وسى كەزگە دەيىن ىستەپ كەلگەن ديسكۋسسيالىق الاڭدار مەن تالقىلاردىڭ ماتەريالدارىن زەرتتەۋ، باسپاسوزدە جارىق كورگەن ماقالالاردىڭ مازمۇنى، ساراپشىلار مەن ساياساتكەرلەردىڭ پىكىرى نەگىزىنەن بەس زاڭنىڭ اياسىنداعى سىن مەن داۋ-داماي ەكەنىن ايقىن كورسەتەدى. وسى بەس زاڭ تۇزەلەتىن بولسا، وسى بەسەۋى ىرىققا كەلسە، دۇرىس سايلاۋ وتەدى، ساياسي پليۋراليزم مەن ساياسي بەلسەندىلىككە، ساياسي باسەكەلەسىتككە جول اشىلادى دەگەن پايىمدار بار.

بۇل زاڭدار:

«قازاقستان رەسپۋبليكاسىندا بەيبىت جينالىستار، ميتينگىلەر، شەرۋلەر، پيكەتتەر جانە دەمونستراسيالار ۇيىمداستىرۋ مەن وتكىزۋ ءتارتىبى تۋرالى» 1995 جىلدىڭ 17 ناۋرىزىنداعى زاڭ؛

2002 جىلدىڭ جازىندا قابىلدانىپ، سان مارتە جامالعان «ساياسي پارتيالار تۋرالى» زاڭ؛

1999 جىلى قابىلدانىپ، قىرىق جامالعان «بۇقارالىق اقپارات قۇرالدارى تۋرالى» زاڭ؛

باعىنان سورى كوپ، تالاي-تالاي داۋدىڭ وزەگى بولىپ تابىلاتىن، 1995 جىلى قابىلدانىپ، سوڭىنان مىڭ قۇبىلعان «قازاقستان رەسپۋبليكاسىنداعى سايلاۋ تۋرالى» زاڭ؛

«قازاقستان رەسپۋبليكاسى پارلامەنتى مەن ونىڭ دەپۋتاتتارى تۋرالى» زاڭ.

سونىمەن قاتار، قوعامدىق ورتا مەن سانادا «جەرگىلىكتى ءوزىن-وزى باسقارۋ تۋرالى»، «سوت رەفورماسى جانە پەنيتەنسيارلىق جۇيەلەردى رەفورمالار تۋرالى» ارنايى تۇجىرىمدامالار ءبىرىنشى كەزەكتە قابىلدانۋى ءتيىس دەپ وتىرمىز، –  دەدى ايدوس سارىم ءوز سوزىندە

سونداي-اق ايدوس سارىم حالىقارالىق ىزگىلەندىرۋ تالاپتارى نەگىزىندە ءولىم جازاسى ۇعىمىنان تولىق باس تارتىپ، عۇمىرلىق باس بوستاندىعىنان ايىرۋ بابىن ەنگىزۋدى ۇسىندى.