ۇلتتىق يدەولوگيانى قالىپتاستىرۋ – زامان تالابى. ال ۇلتتىق مۇددەنى قالىپتاستىرۋ ءتول ءتىلىمىزدى ورىستەتۋدەن باستاۋ الادى. بۇل تۋرالى ۇلتتىق قوعامدىق سەنىم كەڭەسىنىڭ وتىرىسىندا قازىبەك يسا ايتتى، دەپ حابارلايدى Qamshy.kz اقپارات اگەنتتىگى. 

كەڭەس مۇشەسى مەملەكەتتىك ءتىلدىڭ قولدانىس اياسىن كەڭەيتۋ ءۇشىن مەملەكەتتىك ءتىلدى مىندەتتەيتىن زاڭ قابىلداۋ قاجەتتىگىن اتاپ ءوتتى.

سونداي-اق ۇلتتىق كەڭەس مۇشەسى قازىبەك يسا «مەملەكەتتىك ءتىل ماسەلەسىن الدىمەن بالاباقشا مەن مەكتەپ قابىرعاسىنان باستاۋ» قاجەتتىگىن ايتتى.

 –مەكتەبىمىزدە شەت ءتىلىن ءبىرىنشى سىنىپتان وقىتۋ تۋرالى  كەلەشەگىمىزگە كەسىر كەلەڭسىزدىككە  بۇرىننان قارسىلىعىن تانىتىپ كەلە جاتقان  قازاقستان پرەزيدەنتى ق. توقايەۆ مۇعالىمدەردىڭ تامىز كەڭەسىندە  بۇل ماسەلەگە نۇكتە قويدى دەسەك تە بولادى. ەندى اتا-انالار قالاۋىمەن شەت ءتىلىن ەكىنشى-ۇشىنشى سىنىپتاردان نەمەسە بەسىنشى سىنىپتان كەيىن وقىتۋ ماسەلەسى كۇن تارتىبىنە شىقتى. نەگىزى ءبىر توقتامعا كەلىپ، شەت ءتىلىن باستاۋىش سىنىپتان كەيىن وقىتۋ دۇرىس دەپ بىلەمىز، – دەدى ۇلتتىق كەڭەس مۇشەسى، اقىن قازىبەك يسا.

ول پرەزيدەنتكە عانا باعىنىشتى مەملەكەتتىك ءتىل اگەنتتىگىن قۇرۋ ماسەلەسىن كوتەردى.

قازىبەك يسا ۇلتتىق كەڭەس وتىرىسىندا قاسىم-جومارت توقايەۆتىڭ قازاقستان پرەزيدەنتى رەتىندە ۇلىتاۋعا جاساعان ساپارىنىڭ تاريحي ماڭىزى زور بولعانىن ايتا كەلىپ، التىن وردانىڭ 750 جىلدىعى مەن جوشى حاندى قاستەرلەۋ ءۇشىن ۇلكەن مەرەيتويلىق شارا وتكىزۋدىڭ ءمانى بار ەكەنىن ايتتى.

–مەملەكەت باسشىسىنىڭ ۇلىتاۋ ساپارى مەن ۇلاعاتتى سوزدەرى رۋحىمىزدى كوتەرىپ، ەڭسەمىزدى بيىكتەتىپ كەتتى. جوشى حاننىڭ ۇلىتاۋدا تاققا وتىرعانىنا 2023 جىلى 800 جىل تولادى. قازاق مەملەكەتى تاريحىنداعى ەلدىك ماڭىزى ەرەكشە زور بۇل مەرەيتوي مەملەكەتتىك دەڭگەيدە تويلانۋى ءتيىس! مىنە، قازاقستان پرەزيدەنتى ايتقانداي،  جوشى حانعا الەم نازارىن ناعىز اۋدارار كەزەڭ باستالدى دەۋگە بولادى.

مەملەكەت باسشىسىنىڭ ۇلىتاۋ ساپارى ۇلت رۋحىن كوتەرەر ساياسات، ۇلت مۇددەسىن ۇلىقتايتىن كەشەندى شارالار كەرەكتىگىن ۇقتىرۋدا. بۇل باستامانى قالىڭ ەل قۋانا قولداپ جاتىر. تاريحىمىزدىڭ تامىرىندا جاتقان التىن ورداداي اۋقىمى الىپ، تەرەڭ تاقىرىپقا بۇكىل حالىق، بارلىق قوعامدىق-ساياسي قوزعالىستار ءوز  ۇلەستەرىن قوسۋى ءتيىس!، –دەدى قازىبەك يسا.

جوشى حاننىڭ كيەلى كەسەنەسى مەن كەلەشەك كەرەمەت كەشەنى الەم ساياحاتشىلارىن تارتىپ تۇرار تاريحي دا، تارتىمدى دا، تاماشا ورىنعا اينالار ەدى ويتكەنى، ۇلىتاۋدا ۇلى جوشى حاندى ۇلىقتاۋ التىن وردانى اسقاقتاتۋعا باستايدى.

ۇلتتىق كەڭەس مۇشەسى ق. يسا سونداي-اق ءوز سوزىندە «قازاق تاريحىن ناقتى دا، شىنايى دەرەكتەر نەگىزىندە قايتا جازاتىن ۋاقىت كەلگەنىن» ايتتى.

كەڭەس مۇشەسى لاتىن نەگىزدى قازاق ءالىپبيى ماسەلەسىن دە اينالىپ وتپەدى. ونىڭ ايتۋىنشا، الىپبيدەگى كەمشىلىكتەر تۇزەتىلۋى ءتيىس. ماسەلەن "ءى" دىبىسىنىڭ باس ءارپى "ي" دىبىسى بىردەي تاڭبالانادى. بۇل كوپتەگەن شاتاسۋشىلىققا ۇراندىرىپ، "ءى" دىبىسىنىڭ جوعالۋىنا سوقتىرادى.