قوعام بەلسەندىسى، ادۆوكات ايمان وماروۆا ۇلتتىق كەڭەستىڭ جيىنىندا سوت جۇيەسىنە وزگەرىس ەنگىزىلۋ كەرەكتىگىن ايتتى دەپ جازادى Qamshy.kz اقپارات اگەنتتىگى.  

"ەلىمىزدىڭ باستى بايلىعى – ادام. مەن تەك قانا قۇقىق قورعاۋشى ەمەسپىن، ادۆوكاتپىن. قازىرگى كەزدە ساياسي توپتىڭ مۇشەسى رەتىندە بەلگىلى ءبىر زاڭدارعا وزگەرىس ەنگىزىلگەنىن قالايمىن. 

بىرىنشىدەن، ادۆوكاتتاردىڭ تاۋەلسىزدىگىنە نازار اۋدارۋ كەرەك. ادۆوكاتتار سۋديادان، پروكۋروردان قورقىپ جۇرگەن ادامدار. بۇلاي بولماۋى كەرەك. اسىرەسە اۋىلداعى ادۆوكاتتاردىڭ جاعدايى قيىن. بىر-ەكى اۋداندا 1-2 ادۆوكات بار. 

ەكىنشىدەن، ب ا ق تۋرالى زاڭعا وزگەرىس ەنگىزىلسە. اسىرەسە ق ر قىلمىستىق كودەكسىندە جالا جابۋ دەگەن 130-باپ بار. مۇنى الىپ تاستاۋ كەرەك. سەبەبى، جۋرناليستەر ەشكىمنەن قورىقپاي، اقپارات تاراتۋى قاجەت. بۇعان ازاماتتىق ءىستىڭ ءوزى دە جەتكىلىكتى. ءقازىر مەندە 13 جۋرناليست بار. سولاردىڭ قۇقىعىن قورعاپ ءجۇرمىن. جۋرناليستەردى بالاعاتتاعان، قورقىتقان جانە سوققىعا جىققان. بۇل ءبىزدىڭ يمميدجىمىزگە كەرى اسەرىن تيگىزەدى.  

ۇشىنشىدەن، بىزدە بوسقىندار تۋرالى زاڭ بار. مىسالى، جول ءجۇرۋ قۇجاتى دەگەن بار. بۇل بوسقىن مارتەبەسى بەرىلگەن ادامعا قازاقستان اۋماعى شەگىنەن تىسقارى جەرلەردە ءجۇرىپ-تۇرۋعا بەرىلەدى. ءبىراق اتالمىش قۇجات حالىقارالىق ستاندارتتارعا ساي ەمەس. تەك قانا فورمالدى تۇردە بار. سول سەبەپتى تۇبەگەيلى رەفورما كەرەك. 

تورتىنشىدەن، تۇرمە رەفورماسى. تۇرمە ادامدى تۇزەتپەيدى. كوبىسى تۇرمە كۋرورت ەمەس قوي، دەپ تۇسىنبەي جاتادى. سوندا بىزگە تەرگەۋدىڭ، سوتتاۋدىڭ نە قاجەتى بار؟ ۇرىپ-سوعاتىن بولساق، سوتتىڭ نە قاجەتى بار؟ كەرىسىنشە، قىلمىسكەر تۇرمەدە تۇزەلىپ، قوعامعا قايتىپ ورالۋى كەرەك. 

بەسىنشىدەن، زورلىق-زومبىلىققا قاتىستى ماسەلە بار. مەن قاتتى قينالاتىندار زورلانعان ايەلدەر دەپ ويلاۋشى ەدىم. ءبىراق قوعامدا زورلانعان ەر بالالار دا بار. وسى ماسەلەگە قاتىستى دەپارتامەنت قۇرىلۋى كەرەك. ايەلدەرگە بولەك جانە بالالارعا بولەك قۇرىلۋى قاجەت. 13 جاستاعى بالانى سارىاعاش اۋدانىندا زورلاعان. قاسىنداعى بالالار ونى "تەسىك" دەپ اتايتىن بولعان. "جىعىلعانعا جۇدىرىق" دەمەكشى، تۇركىستان اۋداندىق سوتى زورلاعان بالانى اقتاپ، بوستاندىققا جىبەرگەن. ولار ينتەرناتتى جاپقىسى كەلمەيدى. سونىمەن قاتار، ءبىر كىشكەنتاي اۋىلدا 14 ەر ازامات ءبىر قىزدى زورلاعان. ءبىراق ءبىز سول ىسپەن نە بولىپ جاتقانىنان حابارسىزبىز. حالىقتىڭ سوڭعى ءۇمىتى سوت. "سوت جۇيەسىن وزگەرتۋ كەرەك" دەپ ويلايمىن. سوت جۇيەسىندە تەك كاسىبي ماماندار جانە ادال ازاماتتار بولۋى كەرەك"، – دەيدى ايمان وماروۆا.