الماتىدا جەتىسۋ اۋدانىندا بازاردا شىققان ءورتتى ءسوندىرۋ ءۇشىن ءىىم تجك مەن قالا اكىمدىگى اۆياسيانى كوتەرەدى دەپ حابارلايدى Qamshy.kz اقپارات اگەنتتىگى.

ءورت تۋرالى تجد باسپا ءسوز قىزمەتى حابارلاعان بولاتىن.

اقپاراتتارعا سۇيەنسەك، مەتاللپلاستيكالىق بۇيىمدار ساقتالاتىن ءبىر قاباتتى قويمادا ءورت باستالعان. ءورتتىڭ جاقىن ورنالاسقان قويما ءۇي-جايلارىنا ءوتۋ ءقاۋپى تونگەن.

"سيەۆەرنوە كولسو كوشەسى، 78/1. الدىن الا اقپارات بويىنشا، "ميزام" بازارىنىڭ اۋماعىندا كونتەينەر جانىپ جاتىر. وقيعا بولعان جەردە جەكە قۇرامنىڭ 43 قىزمەتكەرى جانە 12 تەحنيكا جۇمىس ىستەپ جاتىر. سونداي-اق، اۆتوپوەزد جانە قوسىمشا كولىكتەر جىبەرىلەدى"، - دەدى قالالىق تجد وكىلدەرى. 

تجد ناقتىلاعان مالىمەتتەر بويىنشا، بازار اۋماعىندا جەكە تۇرعان قويما جانىپ جاتىر. مۇنىڭ الدىندا "ميزام" نارىعى تۋرالى ب ا ق وكىلدەرى جازعان. سول كەزدە الماتى اكىمدىگى بازارمەن كەلىسىم-شارتتى بۇزادى دەپ حابارلانعان بولاتىن.

"مسقب باسقارماسى "ميزام" بازارى رۇقسات قۇجاتىنسىز جانە قالا كەڭەسىندە ايتىلعان مىندەتتەمەلەرىن بۇزىپ، سەگىز مىڭ شارشى مەتر الاڭدى الاتىن تەڭىز كونتەينەرلەرىنەن قالاعا ماشىقتانباعان بازار سالعانىن انىقتادى"، - دەپ حابارلاعان الماتى اكىمدىگى.

الماتى قۇتقارۋ قىزمەتىنىڭ مي-8 جانە "قازاۆياقۇتقارۋدىڭ" ك-32 تىكۇشاقتارى ءورتتى اۋەدەن سوندىرەدى. قازىرگى ۋاقىتتا اۋە كولىكتەرى ۇشۋعا دايىندالىپ جاتىر. بازارداعى قويماداعى ءورت كۇشەيىپ بارادى.