مۇحتار جاكىشيەۆتى مەرزىمىنەن بۇرىن بوستاندىققا شىعارۋ جونىندەگى اپەللياسيالىق سوت وتىرىسى اياقتالدى دەپ جازادى Qamshy.kz اقپارات اگەنتتىگى. سۋديا مۇحتار جاكىشيەۆتى مەرزىمىنەن بۇرىن بوساتۋدان باس تارتتى.
وسكەمەن قالاسىندا سوت وتىرىسى مۇحتار جاكىشيەۆتىڭ قاتىسۋىنسىز ءوتتى. ادۆوكات مۇحتار جاكىشيەۆتىڭ ءۇشىنشى توپتاعى مۇگەدەك ەكەنىن جانە قازاقستاننىڭ ەكونوميكاسىن دامىتۋعا زور ۇلەس قوسقانىن ايتتى.
سۋديانىڭ ۇكىمىمەن كەلىسپەگەن بەلسەندىلەر ءوز نارازىلىقتارىن ءبىلدىرىپ جاتتى. ءبىرى "5 ساعات بويى قويىلىم قويدىڭدار" دەپ ايىپتاسا، جاسى ۇلكەندەر كوزدەرىنە جاس الىپ، سۋديانى قارعادى.
ەسكە سالا كەتسەك، مۇحتار جاكىشيەۆ 2009 جىلى مامىردا ۇستالعان سوڭ سىبايلاس جەمقورلىق قىلمىسىن جاسادى دەپ ايىپتالىپ، 14 جىلعا سوتتالعان. ول جازاسىن وتەۋگە الدىمەن الماتى وبلىسىنداعى زارەچنىي كەنتىندەگى تۇرمەگە جىبەرىلگەن، كەيىن قاراعاندى وبلىسىنىڭ دولينكا كەنتىندەگى قاتاڭ رەجيمدەگى اك-159/6 كولونياسىندا بولدى. 2015 جىلى تۋىستارى، ادۆوكاتى مەن قۇقىق قورعاۋشىلاردىڭ ءوتىنىشىنىڭ ارقاسىندا ول دولينكادان قايتا زارەچنىيعا جىبەرىلگەن. ءبىراق 2017 جىلى ۇقك-نىڭ بۇرىنعى ءتوراعاسى نارتاي دۇتبايەۆتىڭ ىسىنە قاتىستى تەرگەۋ ىسىنە قاتىسۋ ءۇشىن استانا قالاسىنىڭ يزولياتورىنا ەتاپپەن جىبەرىلگەن. تەرگەۋ ءىسى اياقتالعان سوڭ مامىر ايىندا دولينكاعا، ال شىلدە ايىنان بەرى سەمەي قالاسىنداعى قاتاڭ رەجيمدەگى كولونيادا جازاسىن وتەپ جاتىر.
«قازاتومپرومنىڭ» ەكس-باسشىسىنىڭ ادۆوكاتى نۇرلان بەيسەكەيەۆ سوڭعى مەديسينالىق تەكسەرىلۋدەن سوڭ ونىڭ باس مي جۇيەسىندە اقاۋ بار ەكەنى انىقتالعانىن ايتقان بولاتىن. كەيىن بىلتىرعى جىلدىڭ 17 شىلدەسىندە جاكىشوۆتى قاراعاندى وبلىسىنداعى كولونيادان شقو-وبلىسى سەمەي قالاسىنداعى قاتاڭ رەجيمدى كولونياعا اۋىستىردى. وسىنىڭ سەبەبىنەن مۇحتار جاكىشيەۆتىڭ دەنساۋلىعى تاعى دا ناشارلاي ءتۇستى.
ال جازدا ونىڭ جاعدايى مۇلدەم اسقىنا باستادى. جاكىشيەۆ ءۇشىنشى توپتاعى مۇگەدەك قاتارىنا قوسىلىپ، جۇمىس جاساۋ قابىلەتىنىڭ 50 پايىزىنان ايىرىلدى. سونىمەن بىرگە مۇحتار جاكىشيەۆتىڭ جوعارى قان قىسىمنىڭ كەسىرىنەن كوزدىڭ ىشكى تور قابىعى جارىلىپ كەتكەن. كۇز مەزگىلىندە قاراعاندى قالاسىندا جاكىشيەۆتىڭ كوزىنە وپەراسيا جاسالدى.
بۇل از بولعانداي، قىركۇيەك ايىندا مۇحتار جاكىشيەۆتىڭ اناسى قاتتى سىرقاتتانىپ قالدى. جاكىشيەۆ ءحال ۇستىندە جاتقان ناۋقاس اناسىمەن كەزدەسۋىنە رۇقسات بەرۋىن سۇراپ، ءوتىنىش جازدى. الايدا 18 قىركۇيەكتە مۇحتار جاكىشيەۆتىڭ اناسى قايتىس بولدى. كەيىن قارالى حاباردى ەستىگەن مۇحتار جاكىشيەۆ اناسىن سوڭعى ساپارعا شىعارىپ سالۋدى سۇراپ، ءوتىنىش جازدى. ءبىراق وعان مۇنداي مۇمكىندىك بەرىلمەدى.
بيىلعى جىلى 24 شىلدەدە سەمەي قالالىق سوتى مەرزىمىنەن بوساپ شىعۋىن سۇراعان ءوتىنىشىن قاناعاتتاندىرماي تاستاعان بولاتىن. ودان كەيىن وبلىستىق سوتقا شاعىمدانعانداردىڭ ارىزى بويىنشا قارالاتىن ءىستىڭ العاشقى بەلگىلەنگەن ۋاقىتى وزگەرىپ، قىركۇيەكتىڭ 10 كۇنى ساعات 16.00 اۋىستىرىلعان
پىكىر قالدىرۋ