تارازدىق ونەرتاپقىش پەرنەبەك احمەتوۆ بەسىكتىڭ جينالمالى نۇسقاسىن جاساپ شىعارۋدا. ول كاسىپتىڭ بۇل تۇرىمەن 7 جىلدان بەرى اينالىسىپ كەلەدى، دەپ جازادى Qamshy.kz اقپارات اگەنتتىگى. 

ەلباسىنىڭ «ۇلى دالانىڭ جەتى قىرى» ماقالاسىندا كوشپەلى قازاق تۇرمىسىنىڭ ەجەلدەن وركەنيەتتىڭ وزىق ۇلگىسىمەن بىتە قايناساتىندىعى ايتىلادى. راسىندا ءسابيدىڭ تازا ءارى جىلى، ءقاۋىپسىز جاتۋ ءۇشىن بەسىككە بولەۋ ءداستۇرى باعزى زامانداعى قازاقى تۇرمىستىڭ اجىراماس ءبىر بولىگى سانالادى. كۇنى بۇگىنگە دەيىن بالاعا ارنالعان ءتۇرلى جورگەكتەر مەن ۇيىقتاۋىنا ارنالعان جيھازدار بولا تۇرا بالاسىن بەسىككە بولەيتىندەر بارشىلىق. ءارى تاسىمالداۋعا وڭاي جينالمالى بەسىكتىڭ وندىرىسكە ەنگىزىلۋى زامان سۇرانىسى دەۋگە سايادى.

شەبەر پەرنەبەك قىدىربەك ۇلى 2012 جينالمالى بەسىك جاساۋىنا تەلەارنالاردىڭ بىرىندە كورسەتىلگەن باعدارلاما تۇرتكى بولعانىن ايتادى. وندا مامانداردى بەسىكتىڭ كۇندەلىكتى قولدانىستان شىعىپ بارا جاتقاندىعىنىڭ سان ءتۇرلى سەبەبىنە ۇڭىلگەن.

–2012 جىلى وتاندىق تەلەارنالاردىڭ بىرىنەن جۇرگەن «ءبىز» باعدارلاماسىنا كەزەكتى شىعارىلىمىندا بەسىك تاقىرىبى كوتەرىلدى. سوندا ءبىر كەلىنشەك بەسىكتى الىپ ءجۇرۋدىڭ ىڭعايسىز ەكەنىن ايتىپ ماماندارعا قارسى پىكىر ءبىلدىردى. الگى كەلىنشەكتىڭ وسى ءبىرى پىكىرى سانامدا ۇلكەن سىلكىنىس جاسادى. «قالايدا ىڭعايلى بەسىك جاساپ شىعۋىم كەرەك» دەگەن وي كەلدى. ءسويتىپ ءۇش اي بويى كۇندىز-تۇنى ىزدەندىم. وزگە جۇمىستارىم جايىنا قالدى.

ءۇش اي وتكەندە ويىمداعى جينالمالى بەسىكتى جاساپ شىقتىم. جۇمىسىما وزگە ەمەس ءوزىم دە تاڭقالدىم. ءبىراق كىشىلەۋ بولدى. كورگەندەردىڭ ءبارى ايران-اسىر بولىپ، ءوز كوزدەرىنە وزدەرى سەنبەدى. ءسويتىپ بەسىكتى الىپ نۇر-سۇلتان قالاسىنا تارتىپ، «اسەم بەسىك» اتاۋىمەن پاتەنتتەپ الدىم،–دەيدى پەرنەبەك قىدىربەك ۇلى.

قولونەر شەبەرى زاماناۋي ۇلگىدەگى مۇنداي ءبىر بەسىكتى جاساپ شىعۋ ءۇشىن ءۇش كۇن قاجەت ەكەنىن ايتادى. ال ونىڭ قولىنان شىققان جينالمالى بەسىكتىڭ جالپى ۇزىندىعى 83-85 سانتيمەتر. بەسىكتىڭ بۇل كولەمن جيناۋ كەزىندە بار 11 سانتيمەترگە دەيىن كىشىرەيتۋگە بولادى. سالماعى 7-7،5 كەلى تارتادى.

بۇگىندە ەرەكشە تۋىندى ەل اراسىندا زور سۇرانىس يە. ءتىپتى تارازدىق شەبەردىڭ ەرەكشە تۋىندىسى ارقىلى مىسىر، تۇركيا، جۇڭگو، نەپال، گەرمانيا، باشقۇرتستان ەلدەرى دە قازاقى بەسىكتىڭ قۇدىرەتىن تانىپ ءجۇر ەكەن.