جەتىسۋ اۋدانىنىڭ اكىمى ماقسات قيقىموۆ الماتى اكىمدىگىنىڭ باسپا ءسوز ورتالىعىندا اۋدان تۇرعىندارى قويعان وزەكتى ساۋالداردىڭ قالاي ورىندالىپ جاتقانىن ايتىپ بەردى، دەپ حابارلايدى Qamshy.kz اقپارات اگەنتتىگى.
اعىمداعى جىلدىڭ تامىز ايىندا قالا اكىمى باقىتجان ساعىنتايەۆتىڭ جەتىسۋ اۋدانىنىڭ تۇرعىندارىمەن كەزدەسۋى ءوتىپ، ونىڭ بارىسىندا 52 تۇرعىن 82 ساۋال تاستاعان ەدى، قويىلعان سۇراقتاردىڭ 34ء-ى ءبىرىن-بىرى قايتالادى. ءقازىردىڭ وزىندە 11 سۇراق شەشىمىن تاپتى، 9 سۇراق بويىنشا ءتۇسىندىرۋ جۇمىستارى جۇرگىزىلدى، 24 سۇراق جۇمىس ۇستىندە.
م. قيقىموۆ ءوزىنىڭ سوزىندە جەتىسۋ اۋدانىن كەشەندى دامىتۋ جانە اۋدان تۇرعىندارىنىڭ تۇرمىس دەڭگەيىن جاقسارتۋ ءۇشىن الەۋمەتتىك نىسانداردى سالۋ جانە جوندەۋ جوسپارلانعانىن ايتتى.
كەلەر جىلدىڭ قىركۇيەگىنە دەيىن №80، №129 مەكتەپتەردە سەيسميكالىق كۇشەيتۋمەن قاتار كۇردەلى جوندەۋ جۇمىستارىن جۇرگىزۋ جوسپارلانعان. سونىمەن قاتار، وسى كەزەڭگە اينابۇلاق-4 ىقشاماۋدانىندا 200 ورىندى بالا باقشا سالۋ مەجەلەنگەن.
اۋداندا بىردە-بىر دەنەشىنىقتىرۋ-ساۋىقتىرۋ كەشەنى جوق. وسىعان وراي، بۇل ماسەلەنى شەشۋ ءۇشىن ءمجا قاعيداسى بويىنشا دسك سالۋ جوسپارلانعان، سونىڭ ارقاسىندا تەننيسپەن، فۋتبولمەن، دزيۋدومەن، بوكسپەن جانە سپورتتىڭ باسقا دا تۇرلەرىمەن اينالىسىپ، باسسەيندە ءجۇزۋ ءۇشىن بارلىق جاعدايلار جاسالادى.
كەمەل ىقشام اۋدانىندا كۇنىنە 200 ادام قاتىنايتىن ەمحانا سالۋ جوسپارلانعان. №11 ەمحانا سەيسميكالىق جاعىنان كۇشەيتىلىپ، كۇردەلى جوندەۋدەن وتەتىن بولادى. كۇندىزگى وڭالتۋ ورتالىعىنىڭ اۋقىمى كەڭەيەدى. تۇرعىن ءۇي كەشەنىن سالاتىن جەكە ينۆەستورلارعا ەمحانا ءۇشىن 400 شارشى مەتر جەر ءبولۋ جوسپارلانعان. بۇلاردان وزگە، اۋداننىڭ ءۇش ەمحاناسىن مەديسينالىق قۇرالدارمەن جابدىقتاۋ بويىنشا جۇمىستار جۇرۋدە. ناتيجەسىندە، قالا اكىمىنىڭ تاپسىرماسىنا ساي، جەتىسۋ اۋدانىنىڭ تۇرعىندارى، ياعني 47 مىڭ ادام ءبىر قادام جاقىن ساپالى مەديسينالىق قىزمەتكە قولجەتكىزەتىن بولادى.
پىكىر قالدىرۋ