قالا كۇنىن مەرەكەلەۋ باعدارلاماسى تۋرالى مادەنيەت جانە تىلدەردى دامىتۋ ءبولىمىنىڭ باسشىسى نازەركە اققوجينا باسپا ءسوز ءماسليحاتىندا باياندادى، دەپ حابارلايدى Qamshy.kz اقپارات اگەنتتىگى. 

بارلىق قالالىق مۇراجايلار مەن كىتاپحانالاردا قالا تاريحى تۋرالى كورمەلەر ۇسىنىلادى. الايدا، نەگىزگى ءىس-شارالار 20-22 قىركۇيەك ارالىعىندا وتەدى. وسى كۇندەرى ورتالىقتاندىرىلعان كىتاپحانا جۇيەسىندە Book Dating فورماتىندا شارا ءوتىپ، سونداي-اق قالالىق مادەنيەت سارايىندا اقىن دۇيسەنعازى نىعمەتجانوۆتىڭ كۇيتاباعى تانىستىرىلادى. سپورت  سۇيەر قاۋىم فۋتبولدان وتەتىن جارىستا باس قوسپاق. "سيەۆەرنىي" ساۋدا ورتالىعىندا ءداستۇرلى اۋىلشارۋاشىلىق ونىمدەرىنىڭ جارمەڭكەسى وتەدى.

22 قىركۇيەك كۇنى مەرەكە ساعات 11.00-دە باستالىپ، ساعات 23.00-دەيىن جالعاساتىن بولادى. مەيرام اباي، شاكارىم، مۇحتار اۋەزوۆ، ءاليحان بوكەيحانوۆ جانە باسقا دا ماڭىزدى تۇلعالار ەسكەرتكىشتەرىنە گۇل شوقتارىن قويۋمەن باستالىپ، ورتالىق الاڭداعى اۋقىمدى شارالارمەن قورىتىندىلانباق.

– قالا كۇنىندە ءار ءتۇرلى الاڭدار جۇمىس ىستەيتىن بولادى. "مەيىرىمدى سەمەي" بالالار فەستيۆالى، رەترو اۆتوكولىكتەر شەرۋى سىندى شارالار حالىققا ۇسىنىلماق. سونداي-اق، بەس تاقىرىپتىق فوتواۋماقتىڭ بولاتىنىن دا اتاپ وتكەن ءجون. كەز كەلگەن نيەت ءبىلدىرۋشى بۇل جەرلەردە  ەستەلىك سۋرەتكە تۇسىرە الادى. سونداي-اق، Smart-TV ايماعى جۇمىس ىستەپ، تۇرعىندار ارتىستەردى  تىڭداپ قانا قويماي، وزدەرى كاراوكەدە ءان ايتۋعا مۇمكىندىك الادى.  ساعات 19.00 باستاپ قازاقستان ەستراداسى جۇلدىزدارىنىڭ قاتىسۋىمەن كەشكى كونسەرتتىك باعدارلاما، مەرەكەلىك وتشاشۋ  جانە سەمەيلىكتەرگە ارنالعان بي كەشى ۇيىمداستىرىلادى.  بۇل كۇنى قالا اكىمى جاڭا تۋعان نارەستەلەردى، جاس جۇبايلار مەن ارداگەرلەردى مەرەكەمەن قۇتتىقتايدى، – دەدى نازەركە اققوجينا.

سەمەي قالاسىنىڭ اقپاراتتىق ورتالىعى