سەمەي قالالىق مادەنيەت سارايىندا پوليسيا باسقارما باسشىسى دۋلات قازاقپايەۆ تۇرعىندارمەن ەسەپتى كەزدەسۋ وتكىزدى. پوليسيا باسقارما باسشىسى حابارلاعانداي، سەمەيدە جاسالعان قىلمىستاردىڭ ەڭ كوپ تاراعان ءتۇرى ۇرلىق پەن الاياقتىق. بۇعان كوبىنەسە ادامداردىڭ ءوز مۇلكىنە نەمقۇرايلى قاراۋى سەبەپ بولىپ وتىر. تۇرعىندار كوپ جاعدايدا  باعالى زاتتار ساقتالاتىن  ءۇي-جايلاردىڭ ەسىكتەرىن جاپپايدى . تاعى ءبىر سەبەپ-كۇزەت، دابىل جانە بەينەباقىلاۋ كامەرالارىنىڭ بولماۋى. قالالىقتار "OLX"، جانە  "كولەسا.kz"ء-تىڭ قۇرباندارى بولىپ جاتادى.

بۇگىنگى كۇنى الاياقتىقتى اشۋ جانە تەرگەۋ ءۇشىن تاجىريبەلى قىزمەتكەرلەر قاتارىنان توپ قۇرىلدى. ولار كۇن سايىن جالعان حابارلاندىرۋلاردى انىقتاۋ ءۇشىن ينتەرنەت سايتتارعا مونيتورينگ جۇرگىزىپ وتىرادى. سونداي-اق ۇرلىق پەن الاياقتىقتىڭ الدىن الۋ بويىنشا بەينەروليكتەر ازىرلەنىپ، ولار قوعامدىق ورىنداردا كورسەتىلىپ وتىرادى.

جالپى، جىل باسىنان بەرى پوليسيا قىلمىستىق قۇقىق بۇزۋشىلىقتاردى 1188 فاكتىگە تومەندەتتى. 8 اي ىشىندە قالادا بۇزاقىلىق 70%-عا، توناۋ 6%-عا، زورلاۋ 21%-عا كەم، الاياقتىق 36%-عا  جانە ۇرلىق 25%-عا ازايدى. پاتەر ۇرلىعى دا 3 ەسەگە كەمىدى.

دەگەنمەن، پوليسەيلەر قالا تۇرعىندارىن ءوز مۇلىكتەرىنە جاۋاپكەرشىلىكپەن قاراۋعا جانە بەيتانىس ادامدارمەن قارىم-قاتىناستا ساق بولۋعا شاقىرادى.

– ءبىزدىڭ قالا تۇرعىندارىنا ءوز مۇلىكتەرىنە، پاتەرلەرىنە مەن ۇيلەرىنە جاۋاپكەرشىلىكپەن قاراۋعا شاقىرامىن.  قالادا بار ءتيىستى كۇزەت اگەنتتىكتەرىمەن پاتەرلەردى كۇزەتۋگە كەلىسىم-شارت جاساي وتىرىپ، ارنايى دابىل سيگنالدارى ورناتىلۋ كەرەك، – دەدى دۋلات قازاقپايەۆ.

سونداي-اق، وتكەن جىلدان باستاپ سەمەي پوليسياسى قىلمىستىق جانە اكىمشىلىك ءوندىرىستى جۇرگىزۋدىڭ ەلەكتروندىق فورماتىنا كوشتى. ماسەلەن، قىلمىستىق ىستەردى تەرگەۋ كەزىندە بارلىق مالىمەتتەر مەن قۇجاتتار كومپيۋتەر ارقىلى ەلەكتروندىق قىلمىستىق ىسكە ەنگىزىلەدى جانە تەرگەۋ بولىمشەلەرىنىڭ باسشىلارىنا قولجەتىمدى بولادى.

سونىمەن قاتار، پوليسيا قىزمەتكەرلەرى 3-5 مينۋت ىشىندە پلانشەتتىڭ كومەگىمەن اكىمشىلىك قۇقىق بۇزۋشىلىق تۋرالى حاتتامانى ەلەكتروندىق فورماتتا جاساپ، باسىپ شىعارىپ، ونى ازاماتقا قىسقارتىلعان ءىس جۇرگىزۋ تۋرالى تۇبىرتەكتىڭ تۇبىرتەگىمەن قوسا بەرە الادى. بۇرىن بۇل ءراسىم 15-20 مينۋتقا سوزىلاتىن.

ويتكەنى قۇقىق بۇزۋشىنى ۆەدومستۆولىق بازالار بويىنشا تەكسەرۋ قاجەت بولدى. ءقازىر بۇل ازاماتتىڭ جسن ەلەكتروندىق نىسانىنا ەنگىزگەن كەزدە اۆتوماتتى تۇردە جۇزەگە اسىرىلادى.

– بۇگىنگى كۇنى پوليسيا قىزمەتكەرلەرى تەرموپرينتەرى بار 70 پلانشەتتى پايدالانادى. ونىڭ 30-ى سەمەي قالاسىنىڭ جەرگىلىكتى اتقارۋشى ورگانىنىڭ قولداۋىمەن بولىنگەن، – دەدى دۋلات قازاقپايەۆ.

 سەمەي قالاسىنىڭ اقپاراتتىق ورتالىعى