نۇر-سۇلتان قالاسى اكىمىنىڭ ورىنباسارى مەن كوپبالالى انالاردىڭ كەزدەسۋىنەن تۇسىرىلگەن ۆيدەو الەۋمەتتىك جەلىدە قىزۋ تالقىعا تۇسۋدە، – دەپ جازادى Qamshy.kz اقپارات اگەنتتىگى. اكىم ورىنباسارى قالادا ەشقانداي پاتەردىڭ جوقتىعىن ايتۋدا.
"ءبىز ۋادە بەردىك. ۋادەمىزدى ورىندايمىز. ال سىزدەر اقوردانىڭ الدىنا بارىپ، ايعايلاپ جۇرسىزدەر. مەن ەندى ءوز مىندەتىمدى اتقارمايمىن. اقورداعا بارىڭىز، تاعى باسقانى ىستەڭىزدەر مەن سىزدەرگە پاتەر بەرمەيمىن. شىداي تۇرىڭىزدار دەدىم. كەلىسكەن ەدىك. ارنايى ادامداردى جيناپ، كوميسسيا قۇردىق. ءبىراق ءبارى بىردەن بولا قويمايدى عوي. مەن ءقازىر قالاي سىزدەرگە 14 پاتەردىڭ كىلتىن تاراتامىن؟ قالتامنان شىعارىپ جاتقانىم جوق قوي. ادام سەكىلدى ايتىپ تۇرمىن، پاتەر جوق. مەنى ولتىرسەڭىزدەر دە قالادا پاتەر جوق!"، – دەدى اكىمنىڭ ورىنباسارى.
كەيىن كەزدەسۋگە كەلگەن انالاردىڭ ءبىرى اكىمنىڭ ورىنباسارىنا بوتەلكە لاقتىرىپ، "ولەمىن" دەپ ايعايلايدى.
"بوتەلكەنى لاقتىرما. سەن كىمسىڭ؟ مەن ءوزىم پاتەر جالداپ تۇرامىن. ماعان بوتەلكە لاقتىرىپ، بالاعاتتاۋدىڭ قاجەتى جوق ەدى. مەن ەندى بوتەلكە لاقتىرعان ايەلمەن بىرگە جۇمىس ىستەمەيمىن. ماعان دەسە اقورداعا بارسىن. ماعان دەسە اسىلىپ قالسىن. بۇل نە دەگەن مادەنيەتسىزدىك؟ ءبىز بەلگىلى ءبىر ۋاقىت بەرۋلەرىڭىزدى سۇراپ وتىرمىز. كىشكەنە شىداڭىزدار. نەگە بىردەن ماعان كەلمەيسىزدەر؟ نەگە اقوردانىڭ الدىنا باراسىزدار. سىزدەر اقوردانىڭ الدىنا بارعاندارىڭىز ءۇشىن مەن بۇل ماسەلەنى شەشپەيمىن. كەرەك دەسەڭىزدەر سوتتاڭىزدار. مەنىڭ شىدامىم تاۋسىلدى"، – دەيدى اشۋلانعان اكىمنىڭ ورىنباسارى.
الايدا انالار اكىم ورىنباسارىنىڭ بۇل سوزىمەن كەلىسپەي وتىر. كوپبالالى انالاردىڭ ءبىرى 2 اپتا بويى دالادا قونىپ جۇرگەنىن ايتتى.
"ءسىزدىڭ الدىڭىزعا كەلدىك. ءبىز 15 قىركۇيەككە دەيىن كۇتەمىز دەدىك. ۋادەمىزدە تۇردىق. الايدا ءسىز ۋادەڭىزدى ورىندامادىڭىز" دەيدى كوپبالالى انا.
"ەندى ەشقانداي پاتەر جوق. اقورداعا 3-رەت باردىڭىزدار. ءوز كەزەكتەرىڭىزدى كۇتىڭىزدەر. كەزەكتەرىڭىز كەلگەندە پاتەرلەرىڭىزدى الاسىزدار. مەن سىزدەرمەن جەكە-جەكە جۇمىس ىستەمەك بولدىم. وتىنىشتەرىڭىزدى ورىنداۋعا كەلىستىم"، – دەيدى اكىمنىڭ ورىنباسارى.
كوپبالالى انالار اكىمنىڭ قۇر ۋادە عانا بەرگەنىن، وسىعان دەيىن الداپ كەلگەنىن ايتىپ، نارازىلىق ءبىلدىردى.
پىكىر قالدىرۋ