مەملەكەت باسشىسى قاسىم-جومارت توقايەۆ بۇۇ باس اسسامبلەياسىنىڭ 74-سەسسياسى اياسىندا ءبىرقاتار كەزدەسۋلەر وتكىزدى. الەۋمەتتىك جەلىدە ءىسساپاردىڭ العاشقى كۇنىنىڭ بەينەروليگى پايدا بولدى دەپ حابارلايدى Qamshy.kz اقپارات اگەنتتىگى.
ۆيدەونى مەملەكەت باسشىسىنىڭ باسپا ءسوز قىزمەتىنىڭ جەتەكشىسى بەرىك ءۋالي Facebook جەلىسىندەگى پاراقشاسىندا جاريالادى.
"اقش، نيۋ-يورك قالاسى، بۇۇ شتاب-پاتەرى 23.09.19.
قازاقستان پرەزيدەنتى قاسىم-جومارت توقايەۆتىڭ نيۋ-يورككە ساپارى اقش-تاعى ىقپالدى تالداۋ ورتالىعى سانالاتىن "Atlantic Council" ("اتلانتيكالىق كەڭەس") ۇيىمىنىڭ قولداۋىمەن ۇيىمداستىرىلعان بەلگىلى امەريكالىق ساياساتكەرلەرمەن جانە ساراپشىلار قاۋىمداستىعىنىڭ وكىلدەرىمەن كەزدەسۋمەن باستالدى.
كەزدەسۋ بارىسىندا مەملەكەت باسشىسى قازاقستان-امەريكا قارىم-قاتىناستارىنىڭ قازىرگى جاي-كۇيى مەن دامۋ پەرسپەكتيۆالارى، سىرتقى ساياساتتىڭ نەگىزگى باسىمدىقتارى، قازاقستاننىڭ ساۋدا-ەكونوميكالىق جانە ينۆەستيسيالىق الەۋەتى تۋرالى ەگجەي-تەگجەيلى باياندادى.
سونداي-اق، مەملەكەت باسشىسى «Bloomberg» اقپارات اگەنتتىگىنىڭ نەگىزىن قالاۋشى ءارى يەسى مايكل بلۋمبەرگپەن كەزدەستى.
كەزدەسۋ بارىسىندا تاراپتار قازاقستان مەن «Bloomberg» اقپارات اگەنتتىگى اراسىنداعى ىنتىماقتاستىقتىڭ كەلەشەگىن تالقىلاپ، الەمدىك ەكونوميكانىڭ كۇن تارتىبىندەگى وزەكتى ماسەلەلەرى جونىندە پىكىر الماستى.
سونىمەن قاتار، قازاقستان پرەزيدەنتى بۇۇ-نىڭ وركەنيەتتەر اليانسىنىڭ جوعارى وكىلى انحەل موراتينوسپەن كەزدەستى.
تاراپتار ءوزارا ءىس-قيمىل پەرسپەكتيۆالارىن، اتاپ ايتقاندا، ءدىنارالىق كەلىسىم مەن وركەنيەتتەردىڭ جاھاندىق ديالوگىن نىعايتۋ جايىن تالقىلادى.
تۇستەن كەيىن مەملەكەت باسشىسى بۇۇ باس اسسامبلەياسىنىڭ 74ء-شى سەسسياسى اياسىندا امەريكالىق جانە جەتەكشى ترانسۇلتتىق كومپانيالاردىڭ باسشىلارىمەن ءبىرقاتار كەزدەسۋلەر وتكىزدى. كەشكىسىن كومپانيا جەتەكشىلەرىمەن دوڭگەلەك ۇستەل باسىندا پىكىر الماستى" دەلىنگەن جازبادا.
پىكىر قالدىرۋ