الماتىداعى № 4 قالالىق اۋرۋحاناسىنىڭ باس دارىگەرى قانات تەزەكبايەۆ ەشقايدا شىقپاۋ تۋرالى قولحاتپەن بوساتىلدى دەپ حابارلايدى Qamshy.kz اقپارات اگەنتتىگى

الماتى قالالىق سوتىنىڭ قىلمىستىق ىستەر ىستەر جونىندەگى سوت القاسى بۇعان دەيىن قانات تەزەكبايەۆقا قاتىستى تاڭدالعان بۇلتارتپاۋ شاراسىن الىپ تاستادى.

"وعان قاتىستى ەشقايدا شىقپاۋ جانە ءتيىستى ءتارتىپ تۋرالى قولحات تۇرىندەگى جاڭا بۇلتارتپاۋ شاراسى قابىلداندى"، - دەپ ءتۇسىندىردى الماتى قالالىق سوتىنىڭ باسپا ءسوز قىزمەتىنەن.

سونداي-اق، بۇل سوڭعى شەشىم جانە شاعىم تۇسىرىلمەيتىنى حابارلانعان.

ەسكە سالساق، جۋىردا الماتىدا №4 قالالىق كلينيكالىق اۋرۋحانانىڭ باس دارىگەرى قانات تەزەكبايەۆتىڭ ۇستالعانى بەلگىلى بولىپ، №2 مامانداندىرىلعان اۋدانارالىق تەرگەۋ سوتى ەكى ايعا قاماۋعا الۋ تۇرىندەگى بۇلتارتپاۋ شاراسىن تاڭداعان. دارىگەرگە قىلمىستىق كودەكستىڭ 317-بابى، 3-بولىگى "مەديسينالىق نەمەسە فارماسيەۆتيكالىق قىزمەتكەردىڭ كاسىبي مىندەتتەرىن ءتيىستى دەڭگەيدە ورىنداماۋى" بويىنشا ايىپ تاعىلعان بولاتىن. 

تەزەكبايەۆتىڭ باس دارىگەر قىزمەتىنەن ۋاقىتشا شەتتەتىلگەنى حابارلاندى.

سونداي-اق، سوت سانكسياسىمەن №4 قالالىق كلينيكالىق اۋرۋحاناسىنىڭ انەستەزيولوگى اسقار تۇڭعىشبايەۆ تا ەكى ايعا قاماۋعا الىندى. ول دا قىلمىستىق كودەكستىڭ 317-بابى 3-تارماعى بويىنشا ايىپتالىپ وتىر.

ەگەر كىناسى دالەلدەنسە، ءۇش جىلعا دەيىن بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان ايىرىلىپ، بەس جىلعا دەيىن سوتتالۋى مۇمكىن. 

بۇل وقيعاعا بايلانىستى مەملەكەت باسشىسى قاسىم-جومارت توقايەۆ "گەرمانيا اۋرۋحاناسىندا جاسالعان وتادان سوڭ قايتىس بولعان ناۋقاستىڭ ءولىمىن زاڭعا سايكەس تەكسەرۋدى تاپسىردىم. بۇل ماسەلە پرەزيدەنت اكىمشىلىگى، دەنساۋلىق ساقتاۋ مينيسترلىگى، الماتى ق. اكىمىنىڭ باقىلاۋىندا" دەپ تۆيتتەردە جازبا قالدىرعان ەدى.

ال بۇعان دەيىن جەلىدە تەزەكبايەۆتىڭ ۇستالۋى نۇرسۇلتان كۇدەبايەۆتىڭ ولىمىمەن بايلانىستى بولۋى مۇمكىن ەكەنى جازىلعان حات تاراعان ەدى. الماتى پوليسيا دەپارتامەنتىنىڭ باسشىسى سەرىك كۇدەبايەۆتىڭ ۇلى نۇرسۇلتان كۇدەبايەۆ بيىل تامىزدىڭ باسىندا الماتى وبلىسىندا كۆادروسيكلمەن جول اپاتىنا تۇسكەن بولاتىن. 27 تامىز كۇنى جاس جىگىت گەرمانياداعى ەمحانالاردىڭ بىرىندە كوز جۇمدى.