ءبىرعانىم ءايتىموۆا سەناتورلار كەڭەسى ءتوراعاسىنىڭ ورىنباسارى بولىپ تاعايىندالدى دەپ حابارلايدى Qamshy.kz اقپارات اگەنتتىگى.
30 قىركۇيەكتە نۇر-سۇلتاندا سەناتورلار كەڭەسىنىڭ ءبىرىنشى وتىرىسى ءوتتى. وتىرىس بارىسىندا ءبىرعانىم ءايتىموۆا ءتوراعانىڭ ورىنباسارى بولىپ سايلاندى. كەڭەس حاتشىسى بولىپ دەپۋتات نۇرلان قىلىشبايەۆ تاعايىندالدى. كەڭەستى سەنات ءتورايىمى داريعا نازاربايەۆا باسقارادى.
سەناتورلار كەڭەسىنە پارلامەنتتىڭ بۇرىنعى جانە ءقازىر جۇمىس ىستەپ جاتقان 50 دەپۋتات كىردى. وسىعان دەيىن، پرەزيدەنت قاسىم-جومارت توقايەۆ بىرنەشە سەناتورلاردىڭ، ونىڭ ىشىندە ءبىرعانىم ءايتىموۆانىڭ وكىلەتتىگىن توقتاتتى.
ءبىرعانىم ءايتىموۆا 1953 جىلى 26 اقپاندا باتىس قازاقستان وبلىسىندا دۇنيەگە كەلگەن. ءار جىلدارى جاستار ءىسى، تۋريزم جانە سپورت ءمينيسترى، قازاقستاننىڭ يزرايل مەن يتالياداعى ەلشىسى بولدى.
سونداي-اق پرەمەر-مينيستردىڭ ورىنباسارى جانە بعم باسشىسى بولىپ جۇمىس ىستەدى. بۇۇ جانىنداعى قازاقستاننىڭ تۇراقتى وكىلى بولدى. 2013 جىلدىڭ 26 تامىزىندا سەنات دەپۋتاتى بولىپ تاعايىندالدى.
سەناتورلار كەڭەسى كونسۋلتاتيۆتىك-كەڭەسشى ورگان بولىپ تابىلادى جانە قولدانىستاعى جانە بۇرىنعى دەپۋتاتتاردىڭ ۇسىنىستارىن ازىرلەۋ، تاجىريبە الماسۋ، پارلامەنتاريزمدى دامىتۋعا باعىتتالعان شارالاردى وتكىزۋ ءۇشىن قۇرىلعان. ايتا كەتەيىك، مامىدا تۇڭعىش پرەزيدەنت نۇرسۇلتان نازاربايەۆقا قۇرمەتتى سەناتور مارتەبەسى بەرىلگەن ەدى.
پىكىر قالدىرۋ