27 قىركۇيەكتە "قازاقفيلم" كينوستۋدياسى تاپسىرىسىمەن تۇسىرىلگەن رەجيسسەر اقان ساتايەۆتىڭ «توميريس» ءفيلمى كورەرمەنگە جول تارتتى. تاريحي تۋىندى ءۇش ايدان استام ۋاقىتتا ءتۇسىرىلىپ، جوبانى شىعارۋ كەزەڭى ەكى جارىم جىلعا سوزىلعان. ناقتىلاي دەرەككە سۇيەنسەك، كارتينانى ءتۇسىرۋ جۇمىستارى 2017 جىلى جەلتوقسان ايىندا الماتى وبلىسى زارەچنىي اۋىلىنىڭ ماڭىندا باستالعان.

مادەنيەت جانە سپورت ۆيسە-مينيسترى نۇرعيسا داۋەشيەۆ ءفيلمدى تۇسىرۋگە  2 ملرد 259 ملن تەڭگە جۇمسالعانىن ايتىپ ءوتتى.

تۋىندىعا ديماش احيموۆ، ەرىك جولجاقسىنوۆ، بايكەنجە بەلبايەۆ، بەرىك ايتجانوۆ، ەركەبۇلان دايىروۆ، مۇرات بيسەمبين، ازامات ساتىبالدى، ءادىل احمەتوۆ، ايجان لايدجي، ايان وتەپبەرگەن، اسىلحان تولەپوۆ، اسحات ۇرپەكوۆتەر تۇسكەن. ال كيردىڭ رولىنە گولليۆۋد اكتەرى گاسان ماسۋد شاقىرىلعان.

كوپتەن ساعىنا كۇتكەن تۋىندى كوڭىلىمىزدى كۇپتى ەتتى. قازان باستالسا دا، قىركۇيەكتە كورشىنىڭ تىلىندە تۇساۋى كەسىلگەن ءفيلمدى مەملەكەتتىك تىلدە كورۋ باقىتىنا يە بولا المادىق. 

Qamshy.kz اقپارات اگەنتتىگىنىڭ ءتىلشىسى كينوتەاترلارداعى "ءتوميريستىڭ" قازاقشا سەانستارىنا زەرتتەۋ جاسادى. 

الىپ الماتىنىڭ كينوتەاترىندا 1 قازاندا 200-دەن اسا سەانستىڭ التاۋى عانا ءتول تىلىمىزدە كورسەتىلسە، 2 قازان كۇنگى كەستە بويىنشا 261 سەانستىڭ سەگىزى عانا قازاق تىلىندە كورسەتىلمەك. ال كورسەتىلىم ۋاقىتتارى مۇلدەم كورۋگە قولايسىز. مىسالى، «Kinopark 11 (ەسەنتاي) IMAX» كينوتەاترىندا ساعات 13:10-دا، "Kinoplexx Sary Arka»-دا ساعات 13:30-دا دەپ كورسەتىلسە، ەڭ سوڭعى سەانس 19:20-دا دەپ جازىلعان. كەپتەلىسكە شىرمالعان حالىق ۇيىنە جەتە الماي اۋرە-سارساڭ بوپ جۇرگەن ساتتە ءفيلمدى كورە الماسى انىق. ەڭ سوراقىسى، قازاقشا سەانستاردىڭ بيلەتتەرىن ونلاين ساتىپ الۋ تەتىگى جۇمىس جاساماي تۇر.

جۋرناليست قاراشاش ەسەنبايدىڭ فەيسبۋك پاراقشاسىنداعى جازباسى ءتوميريستىڭ قازاقشا كورسەتىلەتىن سەانسىنىڭ ءوزى كوزدەن بۇلبۇلداي ۇشقانىنىڭ  دالەلى بولماق.

ءۇش ميللياردقا جۋىق قارجى جۇمسالعان "وسكار" جۇلدەسىنە ۇسىنۋعا نيەتتى ساتايەۆتىڭ تاريحي ءفيلمىن انا تىلىمىزدە قاي كۇنى كورەمىز؟  

قازاق تاريحىنا قاتىستى ءفيلمنىڭ قازاققا قازاق تىلىندە كورسەتىلمەۋى – ءتىل مەن ۇلتقا جاسالعان قيانات.  ەل بولامىن دەسەڭ، ەكرانىڭدى تۇزە!