قازاقتىڭ اسا كورنەكتى ادەبيەت وكىلدەرى بەيىمبەت مايلين، ءىلياس جانسۇگىروۆ جانە ساكەن سەيفۋلليننىڭ 125 جىلدىعىنا ارنالعان «ءۇش بايتەرەك» اتتى شىعارماشىلىق كەش ءوتتى.

كونسەرتتە قۇرمانعازى اتىنداعى قازاق ۇلتتىق كونسەرۆاتورياسى «حالىق ءانى» كافەدراسىنىڭ مەڭگەرۋشىسى امانگەلدى كۇزەۋباي باستاعان ءداستۇرلى انشىلەر ونەر كورسەتتى.  باراقپاي بەكسۇلتان م.ەگىنبايەۆتىڭ «ءۇش ارىس» ءانىن شىرقاسا، جاندوس سىزدىقوۆ س.سەيفۋلليننىڭ «تاۋ ىشىندە» انىمەن كورەرمەن كوڭىلىنەن شىقتى. بۇل كەشتە «ءۇش بايتەرەكتىڭ» اندەرىمەن قاتار الاش ارىستارىنىڭ مۇرالارىنان دا شىعارمالار ورىندالدى. اتاپ ايتقاندا، شاكارىم قۇدايبەردى ۇلىنىڭ «بۇل ءان بۇرىنعى اننەن وزگەرەك»، احمەت بايتۇرسىن ۇلىنىڭ «اققۇم»، ماعجان جۇماباي ۇلىنىڭ «سەن سۇلۋ» سياقتى اندەرى ايتىلدى. وسى رەتتە «ءۇش بايتەرەكتىڭ» شىعارماشىلىق كەشىندە الاش ارىستارىنىڭ اندەرى دە شىرقالعانى وتە قۇپتارلىق شەشىم بولعانىن باسا ايتقىمىز كەلەدى. سەبەبى، الاش ارىستارىن سول زامانداعى ادەبيەتشىلەردەن ءبولىپ قاراۋعا بولمايدى.

شىعارماشىلىق كەشتە ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ شاكىرتتەرى ولەڭدەردى تەاترلاندىرىلعان كورىنىستەر ارقىلى وقىدى. مۇندا ايارىس داۋقارايەۆ، ايدوس قىزداربەك، شاحماردان الماحانتەگى، نۇرسۇلتان ناجەكەنوۆ، ناريمان ەگىنبايەۆ، نۇرجىگىت تاڭاتار جانە ت.ب. ءتالىم الۋشىلار ونەرلەرىمەن كوزگە ءتۇستى. اتالعان وقۋ ورداسىنىڭ ۇستازى ەلىك نۇرسۇلتان شاكىرتتەرىنىڭ شىعارماشىلىق كەشكە ۇلكەن دايىندىقپەن كەلگەنىن جەتكىزدى.

«بولاشاعىن ۇلكەن ساحنامەن بايلانىستىراتىن شاكىرتتەرىمىز ءاردايىم ىزدەنىستە جۇرەدى. ول بۇگىنگى كەشتە دە بايقالدى. ءىلياس جانسۇگىروۆتىڭ «تولعانۋ»، «قۇلاگەر»، ب.ءمايليننىڭ «قازاققا»، «كەدەيگە»، س.سەيفۋلليننىڭ «ءبىز» سياقتى ولەڭدەرىن شەبەر ورىندادى» دەپ اتاپ ءوتتى.

سونداي-اق بۇل كەشتە وتە اۋقىمدى كورمە ءوتتى. وعان «ءۇش بايتەرەكتىڭ» شىعارمالار جيناعى جانە دە الاش ارىستارىنىڭ ومىرىنەن سىر شەرتەتىن فوتولار مەن باننەرلەر قويىلدى.      

          «ادەبيەت الەمى» جوباسى اياسىندا وتكەن شىعارماشىلىق كەشتى الماتى قالاسى قوعامدىق دامۋ باسقارماسىنىڭ تاپسىرىسى بويىنشا «ماڭگىلىك قازاقستان» قوعامدىق قورى ۇيىمداستىردى.

          ب.مولداحمەت، «ماڭگىلىك قازاقستان» قوعامدىق قورى ءتوراعاسىنىڭ مىندەتىن اتقارۋشى:

–«ءقازىر كوپ ادامدار 1937-1938 جىلعى رەپرەسسيانى كۇنى كەشە عانا، وسىدان مىڭ جىل بۇرىن، سوناۋ تاس عاسىرىندا بولعان وقيعا سياقتى قابىلدايدى. الايدا سەكسەن-اق جىل بۇرىن توگىلگەن قان ءالى كەپكەن جوق. سول كەزدەردەگى قىرعىندى كورگەن ادامداردىڭ كوزى ءالى ءتىرى. بۇگىنگى كەشىمىزگە سول قۋعىن-سۇرگىنگە ۇشىراعان قايراتكەرلەردىڭ ۇرپاقتارى دا قاتىسىپ وتىر.

ج.سارقاسقا