ۇلتتىق قاۋىپسىزدىك كوميتەتى ءتوراعاسىنىڭ ورىنباسارى، شەكارا قىزمەتىنىڭ ديرەكتورى دارحان ءدىلمانوۆ قازاقستان-قىتاي شەكاراسىن زاڭسىز كەسىپ وتكەن ەتنيكالىق قازاقتار قاستەر مۇساحان مەن مۇراگەر ءالىم ۇلىنىڭ ءقازىر بوستاندىقتا ەكەنىن مالىمدەدى، – دەپ Qamshy.kz اقپارات اگەنتتىگى حابارلايدى سپۋتنيككە سىلتەمە جاساپ.

"شىندىعىنا كەلسەك، ولاردىڭ مەملەكەتتىك شەكارانى قالاي كەسىپ وتكەنى ۇلكەن كۇمان تۋدىرادى. سەبەبى مەملەكەتتىك شەكارانى كەسىپ ءوتۋ وڭاي ەمەس. ەستەرىڭىزدە بولسا، ولار شەكارادان 1 قازاندا وتتىك دەدى. ال بۇل كۇنى ءبىزدىڭ كورشىلەر جۇڭگو حالىق رەسپۋبليكاسىنىڭ قۇرىلعان كۇنىن اتاپ ءوتتى. تيىسىنشە، بارلىق مەملەكەتتىك قۇرىلىم كۇشەيتىلگەن رەجيمدە جۇمىس ىستەدى"، - دەدى ءدىلمانوۆ ءماجىلىس كۋلۋارىندا.

ايتۋىنشا، ەتنيكالىق قازاقتار ءقازىر بوستاندىقتا، قاماۋعا الىنعان جوق.

"ولار ءقازىر زايساندا. ولار بىزگە مەملەكەتتىك شەكارانى ناقتى قاي جەردە كەسىپ وتكەنىن كورسەتۋى ءتيىس. وزدەرى تارباعاتاي دەپ وتىر. ءبىز ولاردى تارباعاتايعا اپارامىز، ولار قالاي جانە قايدان كەسىپ وتكەنىن كورسەتەدى"، – دەدى شەكارا قىزمەتىنىڭ ديرەكتورى.

ءدىلمانوۆ ولاردىڭ ءبىرى 2006 جىلى مال ۇرلىعى ءۇشىن قازاق-قىتاي شەكاراسىندا ۇستالعانىن مالىمدەدى.

"ولار ءبىزدىڭ اۋماقتا ۇستالىپ، كەيىن جۇڭگو شەكاراشىلارىنا بەرىلدى. ال ول جاقتا بۇل قىلمىسى ءۇشىن قانداي جازاعا تارتىلعانىن ءوزى ايتىپ بەرەر، مۇمكىن ايتقان دا شىعار"، - دەدى ول.

ول مەملەكەتتىك شەكارانى بۇزعانى ەمەس قىلمىستىق جاۋاپكەرشىلىك قاراستىرىلعانىن، ەگەر كىناسى دالەلدەنسە، ەكى جىلعا دەيىن باس بوستاندىعىنان ايىرىلۋى مۇمكىن ەكەنىن اتاپ ءوتتى. ال قانداستاردى قىتايعا قايتارىپ-قايتارماۋ زاڭ اياسىندا شەشىلەدى.

"ولار ساياسي بوسقىن ەمەس. بوسقىن بولسا، ولار رەسمي تۇردە وتكىزۋ پۋنكتىنە كەلىپ، "مەنى قابىلداۋىڭىزدى سۇرايمىن" دەپ ءوتىنىش جاسايدى. ال بۇل جەردە ونداي بولعان جوق. سوندىقتان شاتاستىرماۋ كەرەك" – دەدى ءدىلمانوۆ.

15 قازاندا ۇكق شەكارا قىزمەتى مەملەكەتتىك شەكارانى زاڭسىز كەسىپ ءوتۋ فاكتىسى بويىنشا جۇڭگو ازاماتتارى قاستەر مۇساقان ۇلى مەن مۇراگەر ءالىمۇلىنا قاتىستى سوتقا دەيىنگى تەرگەۋ ءجۇرىپ جاتقانىن حابارلاعان ەدى.