جۋرناليست جانبولات ماماي باستاعان ءبىر توپ بەلسەندى قازاقستاندا جاڭا دەموكراتيالىق پارتيا قۇراتىندارىن مالىمدەدى. بۇل تۋرالى بەلسەندىلەر بۇگىن، 16 قازاندا الماتىداعى ادام قۇقىعىن قورعاۋ بيۋروسىندا وتكەن باسپا ءسوز ءماسليحاتىندا ايتتى.

باسپا ءسوز ءماسليحاتىندا مامايدان بولەك، ساياساتكەر، قوعام قايراتكەرى تولەگەن جۇكەيەۆ، جۋرناليست سەرگەي دۋۆانوۆ، جۋرناليست اسەل جاڭابايەۆا ءسوز سويلەدى. ولار پارتيا قۇرۋدى بۇرىننان جوسپارلاپ جۇرگەندەرىن ايتتى.  ولاردىڭ ايتۋىنشا، قۇرىلعالى وتىرعان پارتيا "قازاقستاننىڭ دەموكراتيالىق پارتياسى" دەپ اتالماق. 

- ءبىز قازاقستاندا جاڭا ساياسي، دەموكراتيالىق پارتيا قۇراتىمىزدى مالىمدەگىمىز كەلەدى. ءبىز بۇل ماسەلەنى كەشە نەمەسە بۇگىن عانا كوتەرگەن جوقپىز. بۇل وي بىزدە بۇرىننان بار بولدى. ءبىزدىڭ باستى ماقساتىمىز - ساياسي رەفورما جۇرگىزۋ. ساياسي تۇتقىنداردىڭ بوستاندىعىنا قول جەتكىزۋ. ارون ارىنبەك، مۇحتار جاكىشيەۆ سياقتى ساياسي تۇتقىنداردىڭ بوساتىلىپ، مەملەكەتتىڭ ولارعا وتەماقى تولەگەنىن قالايمىز. سونداي-اق، قازاقستاندا "ميتينگىگە زاڭسىز شىقتى دەپ" بەلسەندىلەر مەن ازاماتتاردى 15 تاۋلىككە قامايدى. وسى جاعدايدى وزگەرتكىمىز كەلەدى. ءبىز ادىلەت مينيسترلىگىنە ءوتىنىش تاستاپ، ءبارىن زاڭدى تۇردە جاسايمىز"، - دەدى ماماي.

باسپا ءسوز جيىنىنا سكايپ ارقىلى قاتىسقان جۋرناليست سەرگەي دۋۆانوۆ قۇرىلعالى وتىرعان پارتيانى "تىركەۋدەن وتكىزۋ قيىن" بولاتىن جەتكىزدى. 

- تىركەي مە، جوق پا، ەكىنشى ماسەلە. بىرىنشىدەن تىركەۋ پروسەدۋراسىنىڭ ءوزى ماڭىزدى. ەگەر جاڭا ساياسي پارتيانى تىركەمەيتىن بولسا، بيلىكتىڭ دەموكراتياعا قاراي قادام باسۋعا قۇلقى جوق ەكەنى، قازاقستان پرەزيدەنتى قاسىم-جومارتتوقايەۆتىڭ ساياسي رەفورما تۋرالى ايتقاندارىنىڭ جاي ءسوز ەكەنى بەلگىلى بولادى. وندا بيلىك ءبىرجولا سەنىمنەن ايىرىلادى، - دەدى دۋۆانوۆ.

جانبولات ماماي "قازاقستاندا وزگەرىس جاساۋعا تالپىنىپ جۇرگەن توپتار بار" ەكەنىن ايتىپ، ولاردى بىرىگۋگە شاقىردى.

- بىزدە ءارتۇرلى ساياسي كۇشتەر مەن توپتار بار. مەن بارلىعىن بىرلىككە شاقىرامىن. دەموكراتيالىق قوعامدى اڭسايتىن ساياسي كۇشتەرگە بىرىگەيىك دەگىم كەلەدى. بولىسەتىن ەش نارسە جوق، ءبىز بىرگە بولۋىمىز كەرەك. اركىم ۇستانعان پوزيسياسىنا قاراماستان، بۇگىنگى بيلىكتى وزگەرتكىسى كەلسە بىرگە جۇمىس ىستەۋى ءتيىس. ۇلكەن كۇردەلى ماسەلەلەردى شەشۋدە ءبىر جاعادان باس، ءبىر جەڭنەن قول شىعارىپ، قويان-قولتىق جۇمىس جاسايىق. ءبىز تاۋەلسىز، ءوز پىكىرىن اشىق ايتا الاتىن ازاماتتاردى پارتياعا قوسىلۋعا شاقىرامىز. قازاقستانداعى شىن وزگەرىستەردى قالايتىن ازاماتتار قاتارىمىزعا قوسىلسىن، - دەدى ماماي.