شقو-دا جاڭا احمەردەگى پوليگون ايماعىندا اسكەري جيىن ءوتتى. وعان شقو-داعى وسكەمەن مەن ۇلان اۋدانىنداعى اسكەري مىندەتتىلەر قاتىستى. ولاردىڭ دەنى اۋماقتىق قورعانىس روتاسىنىڭ جازىلۋشىلارى. اسكەري جيىنعا قاتىسۋشىلاردىڭ ءبارى كەزىندە ق ر قارۋلى كۇشتەرىندە جەدەل قىزمەت اتقارعانىن اتاپ وتكەن ورىندى.
تاكتيكالىق-ارنايى جاتتىعۋ بارىسىندا بولىمشەلەر اراسىندا جاۋىنگەرلىك اتىس ۇيىمداستىرىلدى. اقتىق كەزەڭگە وبلىس اكىمىنىڭ ءبىرىنشى ورىنباسارى ەرلان ايمۇقاشيەۆ، سونداي-اق وڭىرگە قاراستى قالالار مەن اۋدانداردىڭ اكىمدەرى قاتىستى. ناتيجەسىندە اۋماقتىق بولىمشەنىڭ اسكەري مىندەتتىلەرى «ۆزۆود قورعانىستا» ءبولىمىنىڭ بارلىق تالابىن ورىندادى.
شقو-داعى جۇمىلدىرۋ باسقارماسى مەن اكىمنىڭ اسكەري قاۋىپسىزدىك جانە قورعانىس جونىندەگى كومەكشىسى ادىلەت ساقاۋوۆتىڭ ۇيىمداستىرۋىمەن شقو-داعى قورعانىس ىستەرى جونىندەگى دەپارتامەنتتە قالالار مەن اۋدان اكىمدەرىنە، سونداي-اق اۋماقتىق قورعانىس سالاسىنىڭ قىزمەتكەرلەرىنە ارنالعان تەوريالىق ساباق وتكىزىلدى. وندا قاتىسۋشىلارعا موبيليزاسيالانعان دايىندىق پەن اۋماقتىق قورعانىستى قالاي دۇرىس جۇرگىزۋ كەرەكتىگى تۋرالى كەڭىنەن ءتۇسىندىرىلدى.
شقو-داعى قورعانىس ىستەرى جونىندەگى دەپارتامەنتىنىڭ باسشىسى قايىربەك قايرقانوۆ ق ر قارۋلى كۇشتەرىندە جەدەل اسكەري قىزمەتىن وتەۋ سىندى باسقا دا تاقىرىپتار بويىنشا ءدارىس وقىدى.
تاكتيكالىق-ارنايى جاتتىعۋىنىڭ وتۋىنە ق ر ۇلتتىق گۆاردياسى، شقو توتەنشە جاعدايلار دەپارتامەنتى مەن دەنساۋلىق ساقتاۋ باسقارماسى قولداۋ كورسەتتى. اتالمىش قۇرىلىمدار مينا-جارىلعىش بوگەتتەردى تابۋ، جارالى جاۋىنگەردى ۇرىس الاڭىنان اكەتۋ، قويما ماڭىنداعى ءورتتى اۋىزدىقتاۋ جۇمىستارىنا جۇمىلدىرىلدى. اسكەري مىندەتتىلەر اتىس جانە تاكتيكالىق ۇرىس ساباقتارىنا قاتىستى. سونىمەن قاتار جاۋىنگەرلىك بىلىمدەرى مەن قارۋدى دۇرىس ۇستاۋ قابىلەتتەرىن شىڭداپ قايتتى.
بۇل اسكەري جيىن بولىمشەلەردى قورعانىس نىساندارى مەن شەتەلدەگى تاپسىرمالاردى بىرلەسىپ ورىنداۋعا ۇيرەتتى.
جيىن ق ر قورعانىس ميينيسترلىگىنىڭ جوسپارىنا سايكەس جۇرگىزىلدى. سونداي-اق شقو اكىمدىگىنىڭ قاۋلىسىنا وراي جەرگىلىكتى اتقارۋشى ورگاندارمەن جانە 99230 اسكەري بولىمشەسىنىڭ قىزمەتكەرلەرىنە ارنالعان تاكتيكالىق-ارنايى جاتتىعۋ ءوتتى. وعان اۋماقتىق قورعانىس بولىمشەسىنەن كەلگەن 88 اسكەري قىزمەتكەر قاتىستى.
ايتا كەتەيىك، جاتتىعۋ جوعارى كاسىبي دەڭگەيدە ۇيىمداستىرىلدى. جيىن سوڭىندا ۇزدىك ناتيجە كورسەتكەن اسكەري مىندەتتىلەرگە گراموتالار تابىستالدى.
پىكىر قالدىرۋ