وزبەكستاننىڭ نامانعان قالاسىندا اليمەنت تولەمەۋ ءۇشىن اكەسى ءوزىنىڭ ءبىر جاسار ۇلىن سۋ اعاتىن ارىققا لاقتىرىپ جىبەرگەن. سونىڭ سالدارىنان ءسابي كوز جۇمدى.بۇل تۋرالى Qamshy.kz اقپارات اگەنتتىگى «سلۋجبا نوۆوستەي سەنترالنوي ازيي» باسىلىمىنا سىلتەمە جاساپ حابارلايدى.

جوعارى سوتقا سىلتەمە جاساعان ب ا ق مالىمىنە، نامانعاننىڭ قىلمىستىق ىستەر بويىنشا وبلىستىق سوتى 26 جاستاعى راسۋلبەك تاشپۋلاتوۆ ءوز ۇلىن قاساقانا ءولتىردى دەپ تانىعان.

سوت ماتەريالدارىنا سايكەس، 2017 جىلى شاڭىراق كوتەرگەن تاشپۋلاتوۆ 2018 جىلدىڭ 4 شىلدەسىندە اكە اتانىپ، ۇلى ومىرگە كەلگەن. الايدا 2019 جىلدىڭ 24 ساۋىرىندە ول ايەلىمەن اجىراسىپ كەتەدى. ونىڭ سەبەبى ۇلى وزىنە ۇقسامايتىنىن ايتىپ، كۇمان كەلتىرۋى بولعان.

سوت شەشىمى بويىنشا، راسۋلبەك تاشپۋلاتوۆ ۇلى 3 جاسقا تولعانشا ءوز تابىسىنىڭ 70 پايىزىن اليمەنت رەتىندە تولەۋگە مىندەتتەلگەن.

الايدا، اليمەنتتەن شىعۋدىڭ ءبىر عانا جولى دەپ ءوز ۇلىن ۇرلاپ اكەتىپ، سۋ اعاتىن ارىققا لاقتىرىپ جىبەرگەن. ارتىنشا 1 جاسار ۇلى سۋعا باتىپ كەتكەنشە باقىلاپ تۇرىپتى.

بولعان وقيعادان كەيىن سوت ەر ادامدى 18 جىلعا باس بوستاندىعىنان ايىردى.