ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ كوپبالالى وتباسىنىڭ بارلىعىنا بىردەي تابىس كولەمىنە قاراماستان 42 500 تەڭگەدەن بەرۋدى ۇسىندى، - دەپ حابارلايدى Qamshy.kz اقپارات اگەنتتىگى

ۇكىمەت وتىرىسىندا مينيستر قازاقستاندا بالالاردىڭ 60 پايىزى كوپبالالى وتباسى مۇشەسى ەكەنىن اتاپ ءوتتى.  سونداي-اق "وسىعان بايلانىستى كوپبالالى وتباسىلار قۇرامىنان اتاۋلى الەۋمەتتىك كومەك الاتىنداردى شىعارىپ، ولارعا تابىس كولەمىنە قاراماستان قولداۋ كورسەتۋدى ۇسىنامىز. بۇل كوپبالالى انالاردىڭ بەدەلىن ارتتىرىپ، ماتەريالدىق جاعدايىن جاقسارتادى"، - دەدى نۇرىمبەتوۆ. ونىڭ مالىمدەمەسىنە زەر سالساق، كوپبالالى  وتباسىلاردىڭ جاردەماقى كولەمى سارالانادى. ءتورت بالاسى بار وتباسى ايىنا 42 500 تەڭگە، بەس بالاسى بار وتباسى ايىنا 53 125 تەڭگە، التى بالاسى بار وتباسى ايىنا 63 750 تەڭگە الادى. ال بالا سانى كوبەيگەن سايىن جاردەماقى دا كوبەيىپ، ەڭ جوعارعى تولەم – 73 370 تەڭگە بولادى.