ۇكىمەت وتىرىسىندا ق ر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ اتاۋلى الەۋمەتتىك كومەككە قاتىستى ءبىرقاتار جاڭاشىلدىقتاردى تانىستىردى. شارالار كومەكتىڭ شىنايى مۇقتاج ادامدارعا عانا تاعايىندالۋىن، الەۋمەتتىك جاعدايىن قاساقانا تومەندەتۋ وقيعالارىنىڭ جولىن قيۋدى قامتاماسىز ەتۋگە باعىتتالعان، دەپ حابارلايدى Qamshy.kz اقپارات اگەنتتىگى.

مينيستر، اتاۋلى الەۋمەتتىك كومەك ومىرلىك قيىن جاعدايعا تاپ بولعان جانە ودان ءوز بەتىنشە شىعۋعا مۇمكىندىگى جوق ادامدارعا عانا تاعايىندالۋى تيىستىگىن ايتتى. وسىعان بايلانىستى ااك توقسان سايىن تاعايىندالماق. ال شارتتى جانە شارتسىز كومەك ءۇش ايعا بەرىلەدى.

بارلىق وتباسى مۇشەلەرىنە ااك ورتا تابىسى مەن كەدەيشىلىك شەگى اراسىنداعى ايىرماشىلىق كولەمىندە تولەنەتىن بولادى.

ەگەر وتباسىنىڭ ەڭبەككە قابىلەتتى مۇشەسى ۇسىنىلعان جۇمىسپەن قامتۋ شارالارىنان باس تارتسا، وندا ول جانە ونىڭ وتباسىنىڭ بارلىق مۇشەلەرى ااك الۋ قۇقىعىنان ايىرىلادى.

سونىمەن قاتار بالا كۇتىمىمەن اينالىساتىن اناعا بالا ءۇش جاسقا تولعاننان كەيىن جۇمىسپەن قامتۋدىڭ بەلسەندى شارالارىنا قاتىسۋ قۇقىعىن بەرۋ ۇسىنىلادى.

سونداي-اق ۋچاسكەلىك كوميسسيالار جۇمىسى كۇشەيتىلەدى.

"وكىنىشكە قاراي، اتاۋلى الەۋمەتتىك كومەك الۋشىلار بىرنەشە قاباتتى جەكە ۇيلەردە تۇرىپ جاتقان، بىرنەشە اۆتوكولىگى بولعان، جەر ۋچاسكەلەرى مەن قوسالقى شارۋاشىلىقتارىنىڭ ۇلكەن كولەمدە بولعان مىسالدار از ەمەس. بۇل جاعدايلار ۋچاسكەلىك كوميسسيانىڭ جاۋاپكەرشىلىگىندە. سوندىقتان زاڭ جوباسىندا ۋچاسكەلىك كوميسسيالار ءۇشىن اتاۋلى الەۋمەتتىك كومەككە مۇقتاجدىعىن انىقتاۋ ولشەم شارتتارىن بەكىتۋ ءۇشىن ورتالىق اتقارۋشى ورگاننىڭ قۇزىرەتىن قاراۋ ۇسىنىلادى"، – دەدى ول.

وسى ورايدا مينيستر اتاۋلى الەۋمەتتىك كومەككە ۇمىتكەر وتباسىلاردىڭ سانىنىڭ ارتۋى قوعامدىق نەگىزدە جۇمىس ىستەيتىن ۋچاسكەلىك كوميسسيالاردىڭ جۇمىسىنا اسەر ەتكەنىن مويىندادى.

«سوندىقتان ءبىز زاڭدا ۋچاسكەلىك كوميسسيالارعا وتباسىنىڭ ماتەريالدىق جاعدايىنا قورىتىندى جاساۋ ءۇشىن مەرزىمدى ءۇش كۇننەن جەتى كۇنگە دەيىن ارتتىرۋدى ۇسىنامىز»، - دەدى ب.نۇرىمبەتوۆ.

ەسكە سالايىق، ق ر ەڭبەك جانە حالىقتى الەۋمەتتىك قورعاۋ ءمينيسترى بۇگىن ۇكىمەت وتىرىسىندا اتاۋلى الەۋمەتتىك كومەكتى بەرۋدىڭ قولدانىستاعى جۇيەسىن وزگەرتەتىن زاڭ جوباسىن ازىرلەدى. باستى باعىت – ەڭبەككە ىنتالاندىرۋ، ازاماتتاردىڭ تابىستارىن جانە مەملەكەتتىك قولداۋ مولشەرىن ەسەپكە الۋعا قاتىستى اشىقتىق پەن ادىلەتتىكتى قامتاماسىز ەتۋ.

قازاقپارات