10 كۇن بۇرىن سىبايلاس جەمقورلىققا قارسى ءىس-قيمىل اگەنتتىگى ۇستالعانىن راستاعان الماتى وبلىسى اكىمىنىڭ ورىنباسارى باعدات ءمانىزوروۆتىڭ دەنساۋلىعىنا بايلانىستى دەمالىستا ەكەنى حابارلاندى. بۇل تۋرالى الماتى وبلىسى اكىمىنىڭ باسپا ءسوز حاتشىسى عالىمۇرات جۇكەل مالىمدەدى.
اكىمدىك وكىلىنىڭ ايتۋىنشا، ءمانىزوروۆ 30 قىركۇيەكتەن باستاپ ەڭبەككە جارامسىزدىق قاعازىن اشتىرعان.
– ول وتكەن اپتانىڭ دۇيسەنبىسىنەن بەرى اۋرۋحانادا. جۇمىسقا قاشان شىعاتىنى بەلگىسىز. قالاي دەنساۋلىعى دۇرىستالادى، سول كەزدە جۇمىسقا شىعاتىن شىعار، – دەدى وبلىس اكىمىنىڭ باسپا ءسوز حاتشىسى.
ءمانىزوروۆتىڭ ۇستالعانى جايلى العاشقى اقپارات 26 قىركۇيەك كۇنى تاراعان. 27 قىركۇيەكتە سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ ءبىرىنشى ورىنباسارى ولجاس بەكتەنوۆ ءمانىزوروۆتىڭ ۇستالعانىن راستاعان. ال 2 قازاندا بەكتەنوۆ جۋرناليستەرگە بەرگەن سۇقباتىندا ءمانىزوروۆ "الاياقتىق" بابى بويىنشا (قىلمىستىق كودەكستىڭ 190-باپ، 4ء-بولىم 2-تارماعى) كۇدىككە ىلىنگەنىن ايتتى.
57 جاستاعى باعدات ءمانىزوروۆ الماتى وبلىسى اكىمىنىڭ ورىنباسارى قىزمەتىنە بيىلعى جىلدىڭ 10 شىلدەسىندە تاعايىندالعان. ول ونىڭ الدىندا الماتى قالالىق مەملەكەتتىك ساۋلەت-قۇرىلىس باقىلاۋ باسقارماسىن ەكى جىل باسقاردى. 2008-2017 جىلدار ارالىعىندا الاتاۋ اۋدانىنىڭ اكىمى بولدى.
پىكىر قالدىرۋ