قازاقستاننىڭ ەكس-پرەزيدەنتى نۇرسۇلتان نازاربايەۆتىڭ باسپا ءسوز قىزمەتى Instagram جەلىسىندەگى elbasy_live پاراقشاسىندا نازاربايەۆتىڭ سۇقباتىنان ءۇزىندى جاريالادى. بۇرىنىراقتا تۇسىرىلگەن ۆيدەودا قازاقستاننىڭ بۇرىنعى پرەزيدەنتى العاش جەمقورلىقپەن قاشان جانە قايدا كەزدەسكەنگەندىگى، نەلىكتەن ۇشقىش بولا الماعاندىعى مەن جۇرەككە العاش تيگەن اۋىر سوققىسى تۋرالى اڭگىمەلەپ بەرگەن.

– بۇل مەدال يەگەرلەرى دە ەمتيحان تاپسىراتىن 1958 جىل ەدى. مەن سول كەزدە العاش رەت تامىر-تانىستىقپەن بەتپە-بەت كەلدىم، ينستيتۋتتا. الماتىدا ەشقانداي تانىسىمىز بولمادى. اكەمنىڭ مەنىڭ ۇلىم وقۋعا ءتۇسىپ جاتىر ەدى دەپ ايتاتىن ەشكىمى جوق ەدى. قولىنان كەلگەن جالعىز مۇمكىندىك – قاشارىن ساتتى. 2300 رۋبل بولدى، وسى اقشانى بەردى دە: "بار، وقى" دەدى. مەن كونكۋرستان وتە المادىم"،  – دەپ ەسكە الدى نازاربايەۆ.

نازاربايەۆتىڭ ايتۋىنشا، بۇل ونىڭ ومىرىندەگى العاشقى اۋىر سوققى بولدى. بۇعان دەيىن ۇنەمى جولى بولىپ جۇرگەن.

– ولاي بولادى دەپ ويلامادىم، ويتكەنى بارلىق ءپاندى جەتىك ءبىلدىم. باسقا بىرەۋ ءوتۋ ءۇشىن، ءتىپتى مەن ونىڭ كىم ەكەنىن دە بىلەمىن، مەنىڭ اياعىمنان شالدى. ول قانداي دا ءبىر باستىقتىڭ بالاسى ەدى،  – دەيدى ول.

بولاشاق پرەزيدەنت باستاپقىدا قۇجاتتارىن حيميا فاكۋلتەتىنە تاپسىرىپتى. سول جەردە العاشقى پاننەن ەمتيحانعا كىرگەنىندە-اق ءبىر حيميكتىڭ كوزىنە تۇسەدى.

– ول نە وقىتۋشى، نە دەكان ەدى، ەسىمدە جوق. ول مەنىڭ وقۋعا ءتۇسىپ كەتۋىمدى قاداعالادى، ويتكەنى حيميك بولعالى ءجۇر ەدىم. ءبىلىمىم تەرەڭ ەكەنىن كوردى. ول ماعان قاتتى قىنجىلىپ تۇرىپ: "سەنى وسىنداي ءىس بويىنشا قۇلاتادى"، – دەدى. مەن ولاي بولۋى مۇمكىن ەمەس دەپ سەنبەدىم. سودان سىرتقا شىعىپ، ءتىزىمدى قاراپ، ءوزىمدى تاپپادىم، – دەپ جالعاستىردى ەلباسى. 

جاس تالاپكەردىڭ ءدال سول جەردە كييەۆ ازاماتتىق اۋە فلوتىنىڭ ينستيتۋتىنا قابىلداۋ ءجۇرىپ جاتقانى جايلى حابارلاندىرۋدى كوزى شالىپ قالادى.

– قۇجاتتارىمدى كورسەتىپ ەدىم، بىردەن وزدەرىنە تارتتى. ۇيگە قايتپاسام بولدى. اۋەجايعا الىپ كەلدى، سوندا بارلىق مەديسينالىق تەكسەرىستەن ءوتتىم. دەنساۋلىعىڭ جاقسى دەدى. كييەۆكە بارۋعا وزدەرى بيلەت ساتىپ الىپ بەردى، – دەيدى ول.

قوشتاسايىن دەپ ۇيگە كەلگەندە، ونىڭ ۇشقىش بولاتىنىن ەستىپ، بۇكىل اۋىل جينالادى.

– انام كوزىنە جاس الدى. باس تارتپايمىن دەپ ەدىم: "سەنى قارعايمىن" دەدى. انانىڭ قارعىسىن وتەۋ مۇمكىن ەمەس. سولاي تاربيەلەندىك قوي. "ساعان جەردە جۇمىس جەتپەي جاتىر ما دەپ كەيىدى. جىبەرمەدى. ءبىراق مەن شامالعاندا ءبارىبىر قالمايتىنىمدى ايتتىم، – دەدى ەلباسى.