قازاقستان پرەزيدەنتى قاسىم-جومارت توقايەۆ 8 قازاندا نۇر-سۇلتاندا ءوزىنىڭ باسقارۋىمەن وتكەن ەلوردانى ودان ءارى دامىتۋ جونىندەگى جينىندا قازاقستان سيفرلى تەحنولوگيالاردى دامىتۋدا قىتايدىڭ تاجىريبەسىن قولدانۋى كەرەگىن ايتتى. 

توقايەۆتىڭ ايتۋىنشا، "قىتايدىڭ سيفرلاندىرۋ تەحنولوگيالارى كەز كەلگەن ادامنىڭ جەكە باس دەرەكتەرى تۋرالى اقپارات بەرەدى".

– Hikvision كومپانياسى (رەد. قىتايدىڭ)… ولاردىڭ تەحنيكاسى جاقسى دامىعان. نەگىزگى قالالارىن سيفرلاندىردى. وتە جاقسى سيفرلاندىردى.  ەكراندى باسساڭ، ادام جايلى بارلىق اقپارات شىعا كەلەدى. قاي جىلى ينستيتۋت ءتامامدادى، بوس ۋاقىتىندا قايدا بارادى، قانداي كرەديتى بار ءبارى شىعادى، – دەدى قازاقستان پرەزيدەنتى. 

سونىمەن قاتار توقايەۆ "ءبىز وسى جولمەن ءجۇرۋىمىز كەرەك. بۇل – الەمدىك تەندەنسيا. استانا باسشىلىعىنا، ۇكىمەتكە جانە ءتيىستى مينيسترلىككە وسىنى تاپسىرامىن" دەگەن سوزدەر دە ايتقان. 

بۇدان بولەك، توقايەۆ وسى جينىدا وتكەن جىلدان بەرى قازاقستاننىڭ بىرنەشە قالاسىندا قولدانىلىپ كەلە جاتقان "سەرگەك" بەينەكامەرالارىنىڭ قوعامدىق قاۋىپسىزدىك دەڭگەيىن ارتتىرۋ ءۇشىن ەمەس، كولىك جۇرگىزۋشىلەردەن ايىپپۇل ءوندىرىپ الۋ ءۇشىن عانا قولدانىلىپ وتىرعانىن سىناعان.

ازاتتىق راديوسىنىڭ جازۋىنشا، توقايەۆ ايتقان Hikvision كومپانياسىنا اقش-تىڭ ساۋدا مينيسترلىگى سانكسيا سالعان. اقش Hikvision باستاعان قىتايدىڭ 28 كومپانياسىن "شىڭجاڭداعى از ۇلتتارعا قىسىم جاساۋعا اتسالىستى" دەپ سانايدى. توقايەۆ قىركۇيەكتە قىتايعا بارعان ساپارىندا Hikvision كومپانياسىنىڭ شتاب-پاتەرىن ارالاعان.

قازاقستاندا 2017 جىلدان بەرى قىتايداعا ەتنيكالىق قازاقتاردىڭ ماسەلەسى كوتەرىلىپ ءجۇر. قىتايدان قازاقستانعا ورالىپ ەل ازاماتتىعىن العان كوپتەگەن ەتنيكالىق قازاقتار سوڭعى جىلدارى قىتايداعى تۋعان-تۋىستارىنىڭ شىڭجاڭداعى "ساياسي تاربيە لاگەرلەرىندە" قىسىم كورىپ وتىرعانىن ايتىپ، قازاقستان بيلىگى مەن حالىقارالىق ۇيىمداردان كومەك سۇراپ كەلەدى. بيىلعى جىلدىڭ قىركۇيەك ايىندا قازاقستاننىڭ بىرنەشە قالالارىندا "جۇڭگو ەكسپانسياسىنا قارسى" نارازىلىق اكسيالارى ءوتىپ، وعان قاتىسقان ونداعان ادام اكىمشىلىك جاۋاپقا تارتىلىپ، كەيبىرى قامالىپ، كەيبىرىنە ايىپپۇل سالىندى. ەل حالقىنىڭ قارسىلىعىنا قاراماستان قازاقستان پرەزيدەنتى 21-25 قىركۇيەك كۇندەرى قىتايعا ىس-ساپارمەن بارىپ، ارتىنشا جۇڭگو پارلامەنتىنىڭ جەتەكشىسى لي چجانشۋ قازاقستانعا كەلدى.