قىزويناق پا الدە جىنويناق پا؟ بۇل كۇندە ۇزاتىلار الدىندا قالىڭدىقتار قۇربىلارىنىڭ باسىن جيناپ كەش ءوتىزۋدى ادەتكە اينالدىرعان. ارينە، مۇنداي شارانى جامان دۇنيە دەۋگە اۋىز بارمايدى. ءبىراق شەكتەن شىعىپ، ادەپتەن اساتىندارعا قاراپ بۇل جايلى ءبىر ءسات ويلانادى ەكەنسىڭ. جاڭادان بەلەڭ العان شوۋدىڭ ارتىق-كەمى جايلى ەۋرازيا ءبىرىنشى ارناسى حابارلايدى.

"قىزويناقتار بۇل كۇندەردە كوپ دەيدى، ويباي-ويباي، بولا بەرسىن كوپ. مەيلى!. ارتىق شىعىن بولسا داعى قىزدارعا، قوسىمشا تابىس بىزگە كوپتىك ەتپەيدى". ءيا، "ديەۆيچنيك" ۇيىمداستىرىپ جۇرگەندەردىڭ بۇل كۇنگى ۇرانى وسى ما، دەرسىڭ. قازاقستاندىق قالىڭدىقتارعا ۇناپ جاتقان جاڭا ءۇردىس، قوماقتى قاراجاتتىڭ كوزىنە اينالعان.  

ەكاتەرينا ميحەل، مەيرامحانالار جەلىسىنىڭ ارت ديرەكتورى:

– ديەۆيچنيكتى ۇيىمداستىرۋدى تولىق قولىمىزعا الساق، شامامەن 90 مىڭ تەڭگەدەن باستالادى.  باعاعا شەكتەۋ جوق. قالىڭدىق پەن قۇربىلارىنىڭ قويعان تالاپتارىنا قاراي ميلليون تەڭگەگە دەيىن كەتە بەرەدى. ونىڭ ىشىنە وبرازدار ويلاپ تابۋ، كونسەرتتىك باعدارلاما، جۇرگىزۋشىنىڭ بولۋى، داستارحان تاعى باسقالار كىرەدى. ءبىزدىڭ قىزدار ءقازىر ءوزىن حانشايىم سەزىنەدى عوي. ليمۋزين كەرەك، فوتوگراف، ۆيدەو قاجەت دەپ بارلىعىن تۇگەل قامتىعىسى كەلەدى جانە بارلىعىن تاڭ قالدىرۋدى دا ويلايتىنداي.

شوۋ دەگەننەن شىعادى. جاقىندا ءانشى لۋينانىڭ بويداق كۇندەرىمەن قوشتاسۋ كەشى ءوتتى. ايتارى جوق، ول شارانى ەرىنبەگەننىڭ ءبارى كورىپ، تالقىلادى. قۇربىلارىنىڭ باسىن قوسىپ وتكىزگەن قىزويناقتىڭ قۇنى اجەپتاۋىر بولعانعا ۇقسايدى. بىرەۋدىڭ تەڭگەسىن تالقىلاۋدان اۋلاقپىز. دەگەنمەن، وسى ءپاتيدىڭ كوپشىلىك كوزىنە ىلىگۋىنە مىنا جىگىتتەر سەبەپ بولدى. ۋقالاۋ-سيپالاۋمەن اينالىساتىن ماماندار دەپ تانىستىرىپتى. ۋقالادى ما، جوق الدە ءجاي عانا سيپالاۋمەن اينالىستى ما، ءبىر قۇداي بىلەدى. ءبىراق، مۇنداي اشىقتىق قوعام نارازىلىعىنا تاپ بولدى.

«بۇل نە دەگەن قۋانىش، بۇل نە دەگەن باقىت!».

ءبىراز ۋاقىتتان بەرى ءتۇرلى شارالاردى ۇيىمداستىرىپ جۇرگەن مىنا سىمبات قىزداردىڭ تالعامى تاۋداي ەكەنىن ايتادى. كەيبىرى ءتىپتى ستريپتيز بيلەيتىن "باتىرلار" كەرەك دەپ سۇرايتىن كورىنەدى. ءبىراق، بۇل كىسىلەر "ادەپتەن اسپايمىز" دەپ باس تارتىپ كەلەدى ەكەن. ال ءستيلدىڭ ءتۇر-تۇرى بار.

سىمبات تىنىسبەكوۆا، توي ۇيىمداستىرۋ ورتالىعىنىڭ مامانى:

– كوبىنەسە زاماناۋي ەۋروپالىق ستيلدە، مىسالى ەۋروپالىق جانە شىعىس ستيلىنە ەلىكتەپ جاتادى قىزدار. تۇندە كيەتىن سوروچكالار جانە فاتالار ارنايى ستيلدە تاپسىرىس بەرىپ جاتادى.  قىزدىڭ قۇربىلارى باسقا كەشتەرگە قاراعاندا ەرەكشە بولعانىن قالايدى.

جاقىندا جەلىدە جەلدەي ەسىپ تارالعان قىزويناقتاردىڭ ءبىرىن اكتريسا، بلوگەر اتانعان ايىم سەيتىمەتوۆا وتكىزدى. ونىڭ كەشىنىڭ «مافيا» ستيلىندە بولعانىنا مىنا ۆيدەولار دالەل. اراب، شىعىس، ءتىپتى، مىنا مافيا بىلاي تۇرسىن، جەرلەۋ ءستيلىن تاڭدايتىندار دا بار ەكەن.

ەكاتەرينا ميحەل، مەيرامحانالار جەلىسىنىڭ ارت-ديرەكتورى:

– بۇل وقيعانى ماعان ارىپتەسىم ايتىپ بەردى. جەرلەۋ ءراسىمى كەزىندە قوسىلاتىن اۋەن ويناعان. سول ساتتە قالىڭدىقتى  تابىتقا سالىپ كىرگىزەدى. ياعني، قۇربىلارى ونىمەن وسىلاي قوشتاسىپ جاتىر ەكەن   ديەۆيچنيك كەزىندە.  بۇدان باسقا دا مىسالدار جەتىپ ارتىلادى. مىسالى، مىسىق بولىپ كيىنەدى، حانشايىمدار بولىپ تۇرلەنەدى. ايتا بەرسەڭ كوپ. كەيبىر قىزدار ستريپتيز بيلەيتىن جىگىتتەردى دە شاقىرادى. ءبىراق، وتكىزىپ جاتقان شارالارى جايىندا ءتىس جارماۋىن وتىنەدى. ءبىز كەلۋشىلەردىڭ كوڭىلىنەن شىعۋ ءۇشىن كەز كەلگەن تالاپ-تىلەكتەرىن ورىندايمىز.  

جاڭا ءومىردىڭ الدىندا قالىڭدىقتىڭ جاقىن دەگەن قۇربىلارىن جيناپ وتىرىس جاساۋىندا تۇرعان نە بار دەرسىز؟ ارينە، بىرەۋدىڭ جەكە ومىرىنە ارالاسىپ، اقىل ايتۋدان ءارى ءجون سىلتەۋدەن اۋلاقپىز. «ادەپتەن اسپاعان، ارمانعا باستاعان، جان-جاعىم دوس قۇربى، جان-جاعىم جاقسى ادام» دەپ كوڭىلدى كەش وتكىزۋ ەرسى دۇنيە ەمەس. دەسە دە قاراكوزدەرىمىز سول ادەپتەن اسپاسا ەكەن دەيمىز.

«دۇنيە قاراپ تۇرسام شولاق ەكەن، ادامدار بiر-بiرiنە قوناق ەكەن. بارىندا ورالىڭنىڭ وينا دا كۇل، قىزىعى بۇل ءومىردىڭ سول-اق ەكەن».