جىل سوڭىنا دەيىن كىرىسى تومەن ازاماتتارعا كەپىلسىز قارىز بەرۋگە تىيىم سالاتىن شارالار قابىلدانادى. بۇل تۋرالى بۇگىن ۇلتتىق بانكتىڭ ءتوراعاسى ەربولات دوسايەۆ مالىمدەدى،
دوسايەۆ حالىقتىڭ بورىش جۇكتەمەسىنىڭ وسۋىنە وراي جۇيەلى تاۋەكەلدەردى شەكتەۋ ءۇشىن شىلدە ايىندا تۇتىنۋشىلىق كرەديتتەردىڭ سۋبەكتىلەرىن رەتتەيتىن زاڭ قابىلدانعانىن اتاپ ءوتتى.
"جىل سوڭىنا دەيىن 90 كۇننەن اسىپ كەتكەن بەرەشەگى بار كەپىلسىز تۇتىنۋشىلىق قارىزدار بويىنشا تۇراقسىزدىق سوماسىن، كوميسيانى، وزگە دە تولەمدەردى ەسەپتەۋگە، كىرىسى كۇنكورىس دەڭگەيىنەن تومەن ازاماتتارعا قارىز بەرۋگە تىيىم سالۋدى كوزدەيتىن شارالار قابىلدانادى"، – دەدى دوسايەۆ ۇكىمەت وتىرىسىندا.
بۇدان بولەك، كەپىلسىز تۇتىنۋشىلىق قارىزدى كىرىسى تومەن ازاماتتارعا بەرمەۋگە باعىتتالعان رەتتەۋ شارالارى دا قولعا الىنباق.
وسى جىلدىڭ ماۋسىمىندا مەملەكەت باسشىسى ۇكىمەت پەن ۇلتتىق بانككە تابىسى كۇنكورىس دەڭگەيىنەن تومەن ازاماتتارعا قارىز بەرۋگە تىيىم سالۋدى تاپسىرعان ەدى.
بيىل قازاقستاندا ەڭ تومەنگى كۇنكورىس دەڭگەيىنىڭ مولشەرى 29 698 تەڭگە بولدى.
پىكىر قالدىرۋ