الماتىداعى بوكەيحانوۆ كوشەسى مەن رايىمبەك داڭعىلىنىڭ قيىلىسىندا جىلۋ قۇبىرى قىسىم تومەندەۋىنىڭ سالدارىنان جارىلعانى بەلگىلى بولدى. بۇل تۋرالى وقيعا ورنىنا بارعان Qamshy.kz اقپارات اگەنتتىگىنىڭ تىلشىسىنە الماتى قالالىق جىلۋ جۇيەسى مەكەمەسىنىڭ باسپا ءسوز حاتشىسى ناتاليا ينكينا ايتتى.

توتەنشە جاعداي ورىن العان ماڭدا الماتى قالالىق توتەنشە جاعدايلار دەپارتامەنتى مەن "الماتى جىلۋ جۇيەسى" ج ش س قىزمەتكەرلەرى جۇمىس ىستەپ جاتىر.

ناتاليا ينكينانىڭ ايتۋىنشا، جارىلعان قۇبىردان اققان سۋدى سورۋعا جىلۋ جۇيەسى مەكەمەسىنەن 10 تەحنيكا، 6 بريگادا، 18 ادام جۇمىلدىرىلعان.

قامشى ءتىلشىسىنىڭ حابارلاۋىنشا، سۋدىڭ استىندا ءۇش جەڭىل كولىك قالىپ قويعان. ءبىر ادامنىڭ جەڭىل كۇيىك العانى بەلگىلى بولدى. زارداپ شەگۋشى اۋرۋحاناعا بارۋدان باس تارتقان.

سۋ استىندا قالعان كولىكتەرگە كەلگەن شىعىندى الماتى جىلۋ جۇيەسى مەكەمەسى ساقتاندىرۋ نەگىزىندە وتەپ بەرمەك. 30 جىلدىق قۇبىرلاردى كەلەسى جىلى اۋىستىرۋ جوسپارلانىپتى.

بۇگىن، 14 قازان كۇنى كۇندىز الماتى قالاسىنداعى بوكەيحانوۆ كوشەسىندە جىلۋ قۇبىرى جارىلىپ، كوشەنى ىستىق سۋ باسىپ جاتقانى حابارلانعان.