"مۇزبالاق" انيماسيالىق ءفيلمى ۇستىمىزدەگى جىلى قازاننىڭ 7ء-ى مەن 13ء-ى ارالىعىندا گەرمانيانىڭ حەمنيس قالاسىندا وتكەن 24ء-شى حالىقارالىق بالالار مەن جاسوسپىرىمدەرگە ارنالعان Schlingel كينوفەستيۆالىندە  گەرمانيانىڭ انيماسيالىق فيلمدەر ينستيتۋتى (DIAF) تاعايىنداعان  «ۇزدىك انيماسيالىق فيلم» جۇلدەسىمەن ماراپاتتالدى دەپ حابارلايدى Qamshy.kz اقپارات اگەنتتىگى قازاقفيلم رەسمي سايتىنا سىلتەمە جاساپ.

قازاقتىڭ عاسىرلار بويى قالىپتاسقان ساياتشىلىق مادەنيەتى تۋرالى سىر شەرتەتىن «مۇزبالاق» انيماسيالىق ءفيلمى بۇركىت پەن ادامنىڭ دوستىعى تۋرالى باياندايدى. ءفيلمدى ق ر مادەنيەت جانە سپورت مينيسترلىگى تاپسىرىسى بويىنشا ش.ايمانوۆ اتىنداعى «قازاقفيلم» اق تۇسىرگەن. رەجيسسەرلەرى –تۇردىبەك مايدان جانە تىلەك تولەۋعازى.

«2D  انيماسياسىنىڭ  تاڭ قالدىرارلىق ۇلگىسى. Disney جانە Pixar انيماسيالىق كەڭىستىگىنەن تىس جەردە جاسالعان ناعىز جاڭالىق»، دەلىنگەن فەستيۆالدىڭ باسپا ءسوز بايانىندا.

Schlingel حالىقارالىق فەستيۆالىن گەرمانيانىڭ بالالار مەن جاسوسپىرىمدەر جونىندەگى ساكسون قىزمەتى ۇيىمداستىرعان. بيىل بۇل بايقاۋدا 52 ەلدەن كەلگەن 233 بالالار مەن جاسوسپىرىمدەرگە ارنالعان فيلمدەر كورسەتىلدى.

- كوز مايىن تاۋىسىپ جاساعان تۋىندىمىز ەۋروپاداعى ءىرى فەستيۆالدە ۇزدىك دەپ تانىلىپ جاتقانىنا قۋانىشتىمىز. بۇل فيلم ۇلتتىق بوياۋى قانىق، قازاقتىڭ بولمىسىن كورسەتەتىن تۋىندى، سوندىقتان دا شەتەلدىكتەرگە قىزىقتى بولدى دەپ ويلايمىن. وسى ورايدا، بىزگە قولداۋ كورسەتىپ، وسى ءفيلمنىڭ شىعۋىنا سەبەپكەر بولعان مادەنيەت جانە سپورت مينيسترلىگىنە، «قازاقفيلم» كينوستۋدياسىنا العىسىمىزدى بىلدىرەمىز. وسىنداي جەڭىستەر كوپ بولىپ، «مۇزبالاق» بارشامىزدى قۋانتا بەرسىن، - دەدى ءفيلمنىڭ رەجيسسەرى تۇردىبەك مايدان.

ەستەرىڭىزگە سالا كەتسەك، بىلتىر «مۇزبالاق» ءفيلمى قازاقستاننىڭ كينەماتوگرافيستەر وداعى تاعايىنداعان «قۇلاگەر» سىيلىعى – «ۇزدىك انيماسيالىق فيلم» جۇلدەسىمەن  ماراپاتتالعان. سونىمەن قاتار، انيماسيالىق تۋىندى رەسەيدە وتكەن XVII حالىقارالىق «الاۋ رۋحى» («دۋح وگنيا») اتتى دەبيۋتتىك فيلمدەر كينوفەستيۆالىنىڭ جاسوسپىرىمدەر مەن بالالارعا ارنالعان بايقاۋىنا جانە  چەحيانىڭ زلين قالاسىندا وتكەن 59-شى بالالار مەن جاسوسپىرىمدەرگە ارنالعان «پانوراما» فەستيۆالىنىڭ كونكۋرستان تىس باعدارلاماسىنا  قاتىستى. ودان بولەك، بۇل فيلم رەسەيدە وتكەن 14 حالىقارالىق «وتباسىمەن بىرگە» فەستيۆالىندە ارنايى جۇلدەگە قول جەتكىزدى.