2020 جىلى ءاربىر ساقتاندىرىلعان ادامعا كورسەتىلەتىن مەديسينالىق كومەككە 83،1 مىڭ تەڭگە جۇمسالماق. ناتيجەسىندە ازاماتتاردىڭ دەنساۋلىققا جۇمسايتىن جەكە شىعىندارى ەداۋىر قىسقارادى. بۇل تۋرالى مەديسينالىق ساقتاندىرۋ قورى باسقارما ءتوراعاسىنىڭ ورىنباسارى ەرىك ءبايجۇنىسوۆ حابارلادى.

ونىڭ ايتۋىنشا، تەگىن مەديسينالىق كومەككە بولىنەتىن قاراجات كولەمى جىل سايىن ارتىپ وتىرعانىنا قاراماستان، مەديسينا سالاسىنداعى شىعىنداردىڭ 41 پايىزى حالىقتىڭ قالتاسىنان شىعادى. بۇل ددسۇ بەلگىلەگەن مەجەدەن ەكى ەسە كوپ.

قور مالىمەتىنشە، ءقازىر حالىقتىڭ 93%-ى ساقتاندىرۋ جۇيەسىمەن قامتىلعان. ونىڭ 58%-ى – مەملەكەت تاراپىنان ساقتاندىرىلاتىن جەڭىلدىگى بار 11 ملن ازامات. قالعانى – جالدامالى جۇمىسشىلار، جەكە كاسىپكەرلەر مەن بجت تولەۋشىلەر. ساقتاندىرىلعانداردىڭ ءبارى دە 2020 جىلدان باستاپ كەڭەيتىلگەن كولەمدە مەديسينالىق كومەك الا الادى. ولاردىڭ قاتارىندا سالالىق ماماندار كەڭەسى، باعاسى قىمبات زەرتحانالىق اناليزدەر مەن مرت، كت سىندى دياگنوستيكالىق زەرتتەۋلەر دە بار.

– تۇرعىندارعا از مولشەردە جارنا تولەپ، اۋىرىپ قالعان جاعدايدا قۇنى ميلليونداعان تەڭگە تۇراتىن كومەككە قول جەتكىزۋگە بولاتىنىن ايتىپ ءتۇسىندىرۋىمىز كەرەك. مىسالى، جۇرەك نەمەسە باۋىر الماستىرۋ سىندى كۇردەلى وپەراسيالار قولجەتىمدى بولماق. الەۋمەتتىك ساقتاندىرۋ دەگەنىمىز مىنە، وسى، – دەدى ە.ءبايجۇنىسوۆ.

جۇرتشىلىقتى "جۇمىستان شىعىپ قالعان جاعدايدا مەديسينالىق كومەك كورسەتۋ ءتارتىبى وزگەرە مە" دەگەن ساۋالدىڭ مازالايتىنى انىق.

– جۇمىسسىز قالعان ازاماتتار ءمامس پاكەتىنە ەنگەن قىزمەتتەردى جارنا تولەۋ توقتاعاننان كەيىن ءۇش اي بويى پايدالانا الادى. باسقا جۇمىسقا تۇرعاننان كەيىن جۇمىس بەرۋشى ونىڭ اتىنا اۋدارىم جاساي باستايدى. ال، «ەكى قولعا ءبىر كۇرەك» تاپپاعان جاعدايدا ءتيىستى ورىندارعا حابارلاسىپ، جۇمىسسىز رەتىندە رەسمي تىركەلۋ قاجەت. بۇل سانات مەملەكەت تاراپىنان ساقتاندىرىلادى، – دەدى قور باسشىسىنىڭ ورىنباسارى.

ەستەرىڭىزگە سالا كەتسەك، ازاماتتار مەديسينالىق كومەككە قاتىستى ساۋالدارىن 1406 نومىرىنە جولداي الادى.

مسق الماتى قالالىق فييالىنىڭ باسپا ءسوز قىزمەتى