ءبىلىم جانە عىلىم ءمينيسترى اسحات ايماعامبەتوۆ رەكتورلارعا جوعارى وقۋ ورىندارىندا جۇمىس ىستەيتىن وقىتۋشىلاردىڭ جالاقىسىن 30-50 پايىزعا كوتەرۋدى تاپسىردى. بۇل تۋرالى ول ءوزىنىڭ Facebook-تەگى پاراقشاسىندا جازدى.

– مەملەكەت باسشىسى ءبىلىم بەرۋ ساپاسىن ارتتىرۋ جانە پەداگوگتاردى قولداۋ جونىندە تاپسىرما بەردى. وسى تاپسىرما اياسىندا مينيسترلىك مەملەكەتتىك جوو رەكتورلارىنا وقىتۋشىلاردىڭ ەڭبەكاقىسىن 2020 جىلدىڭ 10 قاڭتارىنا دەيىن 30-دان 50%-عا دەيىن ارتتىرۋ مىندەتىن جۇكتەدى. بۇل شەشىمنىڭ ناقتى نەگىزى بار، –  دەپ جازدى ايماعامبەتوۆ.

ءمينيستردىڭ سوزىنشە، "جوعارى وقۋ ورىندارىنىڭ بيۋدجەتىنە تالداۋ جاسالدى، سونىڭ ناتيجەسىندە وقىتۋشىلاردىڭ جالاقىسىن كوتەرۋ ءۇشىن قاجەتتى قور بار ەكەنى انىقتالدى".

– بۇگىندە ءبىرقاتار جوعارى وقۋ ورنىنىڭ وقىتۋشىلارى 60-70 مىڭ تەڭگە كولەمىندە جالاقى الادى. مۇنداي ساياساتپەن ءبىلىم ساپاسىن تالاپ ەتۋ مۇمكىن ەمەس. ەۋرازيا ۇلتتىق ۋنيۆەرسيتەتى، كاسپيي ۋنيۆەرسيتەتى مەن تاراز پەداگوگيكالىق ۋنيۆەرسيتەتى سياقتى جوعارى وقۋ ورىندارى جالاقىنى ءقازىردىڭ وزىندە كوتەرە باستادى. قالعان مەملەكەتتىك جوو مەنىڭ تاپسىرمامدى مىندەتتى تۇردە ورىنداۋى ءتيىس"، – دەدى ايماعامبەتوۆ.

بۇدان بولەك، مينيستر عىلىمي ەليتانى قولداۋ ماقساتىندا جوعارى وقۋ ورىندارىندا جۇمىس ىستەيتىن اكادەميكتەرگە قوسىمشا اقى تولەۋ قاجەتتىگىن ەسكە سالدى. ءمينيستردىڭ سوزىنشە، "اكادەميكتەرگە قوسىمشا اقى تولەۋ ءۇشىن مەملەكەتتىك بيۋدجەتتەن قوسىمشا قاراجات ءبولۋدىڭ دە قاجەتى جوق".

– مۇنى قولدا بار قارجىمەن شەشۋگە بولادى. بولاشاقتا جاس عالىمداردى قولداۋ تەتىكتەرى دە قاراستىرىلاتىن بولادى، – دەدى ايماعانبەتوۆ.