الماتى اكىمدىگى جۇمىسشىلاردىڭ ميتينگىگە شىعۋى تۋرالى اقپاراتقا قاتىستى پىكىر ءبىلدىردى دەپ حابارلايدى Qamshy.kz اقپارات اگەنتتىگى Tengrinews.kz سايتىنا سىلتەمە جاساپ.
قالالىق موبيلدىلىك باسقارماسىنىڭ حابارىنا قاراعاندا، نارازىلىققا شىققان "موستوسترويتەلنىي وترياد №25 يمەني ريازانوۆا ا." ج ش س جۇمىسشىلارى، ولار رىسقۇلوۆ داڭعىلى مەن ەمسوۆ كوشەسىنىڭ قيىلىسىنداعى جولايرىقتى سالىپ جاتىر. جۇمىسشىلار 2018 جىلدىڭ قاراشاسى مەن 2019 جىلدىڭ مامىرى ارالىعىنداعى جالاقىسىن الماعان.
ۆەدومستۆوداعىلار تاپسىرىس بەرۋشىلەردىڭ مەردىگەر ۇيىمعا اقشا قارىز ەكەنىن مالىمدەدى. كومپانيا وزىندىك سەبەپتەرىمەن 32 قىزمەتكەرىنە 18،3 ميلليون تەڭگە قارىز بولىپ قالعان.
"بۇگىن ەڭبەك قاۋىپسىزدىگىن باقىلاۋ ءبولىمىنىڭ باسشىسى، الماتى قالاسى الەۋمەتتىك ءال-اۋقات باسقارماسىنىڭ باسشىسى وقيعا ورنىنا باردى. قىزمەتكەرلەرگە ەڭبەك زاڭناماسىنىڭ نورمالارىنا تۇسىنىكتەمە بەرىلدى. وسى فاكتى بويىنشا (پايدا بولعان بەرەشەك جايلى ايتىلىپ وتىر) الماتى وبلىسىنىڭ ەڭبەك ينسپەكسياسى جوسپاردان تىس تەكسەرىس جۇرگىزدى. جۇمىس بەرۋشى اكىمشىلىك جاۋاپكەرشىلىككە تارتىلدى. ەرەجەبۇزۋشىلىقتاردى جويۋ تۋرالى ۇيعارىمدار بەرىلدى.
بۇگىندە نۇسقامالار ورىندالماعان. تەكسەرۋ ماتەريالدارى ق ر قك-نىڭ 152-بابى بويىنشا شەشىم قابىلداۋ ءۇشىن قۇقىق قورعاۋ ورگاندارىنا جولداندى"، - دەپ جاۋاپ بەردى الماتى اكىمدىگى. مۇنىڭ الدىندا الەۋمەتتىك جەلىلەردە نارازىلىققا شىققان جۇمىسشىلاردىڭ سۋرەتى جاريالانعان بولاتىن.
پىكىر قالدىرۋ