كەشە ۇلتتىق كەڭەس اياسىندا ەلوردادا بىرنەشە شارا ءوتتى. بۇل تۋرالى پرەزيدەنت كەڭەسشىسى ەرلان كارين ءوزىنىڭ facebook-تاعى پاراقشاسىندا جازدى.

پرەزيدەنت اكىمشىلىگى جەتەكشىسىنىڭ ورىنباسارى تيمۋر سۇلەيمەنوۆتىڭ توراعالىعىمەن اقوردادا ۇلتتىق كەڭەستىڭ ەكونوميكالىق رەفورمالار توبىنىڭ مۇشەلەرىنىڭ قاتىسۋمەن كىشى جانە ورتا بيزنەستى قولداۋ، جەر رەفورماسى مەن كۆازيمەملەكەتتىك سەكتوردى جەتىلدىرۋ ماسەلەلەرى تالقىلاندى. اتالعان جينالىسقا قارجى، ۇلتتىق ەكونوميكا، اۋىل شارۋاشىلىعى مينيسترلىكتەرى مەن «اتامەكەن» ۇپ، «سامۇرىق-قازىنا»، «بايتەرەك»، «قازاگرو» قورلارىنىڭ وكىلدەرى قاتىستى.

ال، ۇكىمەت ۇيىندە ۆيسە-پرەمەر بەردىبەك ساپاربايەۆ ۇلتتىق كەڭەستىڭ الەۋمەتتىك-مادەني توبىنىڭ مۇشەلەرىنىڭ قاتىسۋىمەن ادامي كاپيتالدىڭ دامۋى، ءبىلىم بەرۋ، دەنساۋلىق ساقتاۋ جانە مادەنيەت سالالارىنا قاتىستى كەڭەس مۇشەلەرىنىڭ ۇسىنىستارىن تالقىلاۋدى وتكىزدى.

بۇل كەزدەسۋلەر قوعام وكىلدەرى مەن مەملەكەتتىك ورگاندار اراسىندا كوتەرىلىپ جۇرگەن وزەكتى ماسەلەلەر بويىنشا ءوزارا پىكىر الماسىپ، پوزيسيالاردى جاقىنداتۋعا مۇمكىندىك بەرەدى. كوپتەگەن سۇراقتار بويىنشا ورتاق ۇستانىم قالىپتاسۋدا، جالپى ءۇردىس جامان ەمەس.