تاريحى تەرەڭ تاراز قالاسىندا سوڭعى جىلدارى تاريحي-مادەني كەشەندەر، سكۆەرلەر، پاركتەر اشىلىپ، قالا تۇرعىندارى مەن قوناقتارى ءبىر مەزگىل سەرۋەندەيتىن ورىندار بوي كوتەرۋدە. سونىڭ ءبىرى – وتكەنگە وي جۇگىرتىپ، باتىر بابالارىمىز جايلى ۇرپاق الدىندا ونەگە ايتۋعا مۇمكىندىك جاسالعان «ەرلىك» مەموريالدىق كەشەنى. بۇل تاريحي كەشەندە جامبىل وبلىسىنان ۇلى وتان سوعىسىنا اتتانعان، قايتا ورالعان، بەلگىسىز كەتكەن جانە كەڭەس وداعىنىڭ باتىرلارى، تاعى باسقا دا تۇلعالاردىڭ ەسىمدەرى تاسقا قاشالىپ، ماڭگى تاريحتا قالدىرۋ كوزدەلگەن بولاتىن.

جامبىل وبلىسى اكىمدىگىنىڭ مادەنيەت، ارحيۆتەر جانە قۇجاتتاما باسقارماسى باسشىسىنىڭ ورىنباسارى سارا مادييەۆانىڭ ايتۋىنشا، كەشەندە ورنالاسقان كولوننالارداعى ازاماتتار ءتىزىمىنىڭ بارلىعى دەرلىك وبلىستىق، قالالىق، اۋداندىق اسكەري كوميسارياتتاردىڭ الىپبيلىك تىركەۋ كىتاپ-جۋرنالدارىنان الىنىپ جيناقتالعان.

بۇل ءتىزىمدى تۇگەندەۋدى باسقارما باسشىلىعى، وبلىستىق، قالالىق، اۋداندىق ارحيۆ مەكەمەسىنىڭ ديرەكتورلارى مەن قىزمەتكەرلەرى اتقارىپ شىققاندىعىن دا ايتا كەتكەن ءجون.

اتالعان يگى شارا ءالى دە جالعاسىن تاۋىپ، «Erlik.kz» ارنايى سايتى اشىلدى. سايتقا وبلىس بويىنشا جيناقتالعان 106 000 ازاماتتاردىڭ ءتىزىمى ەلەكتروندى نۇسقادا ەنگىزىلگەن. كەز-كەلگەن وقىرمان الەۋمەتتىك جەلىدە ورنالاسقان سايتقا كىرۋ ارقىلى كوپتەگەن مالىمەتتەر الا الادى.

باستى بەتتە كەڭەس وداعىنىڭ باتىرلارى، جامبىلدىق مايدانگەرلەر، وتتى جىلداردىڭ تاريحى جانە گالەريا ورنالاستىرىلعان. سونىمەن بىرگە، ۇسىنىس-پىكىرلەر قالدىرۋ ماقساتىندا بايلانىس تەلەفوندار مەن مەكەن-جايى تۋرالى دا اقپار بار. سايت قولدا بار جاڭا مالىمەتتەرمەن تولىقتىرىلىپ، جاڭارتىلىپ وتىرادى.

-سونىمەن قاتار قالالىق، اۋداندىق اكىمدىكتەر جۇمىسپەن قامتۋ جانە الەۋمەتتىك باعدارلامالار بولىمىنەن قازىرگى تاڭداعى كوزى ءتىرى ارداگەرلەرمەن كەزدەسىپ، اڭگىمە-سۇحبات، فوتو، ۆيدەو، ەستەلىكتەرى جيناقتالدى.

جيناقتالعان مالىمەتتەر نەگىزىندە «جەڭىس ساربازدارى» اتتى ايدار اشىلىپ، ارداگەر قاريالاردىڭ ەستەلىك اڭگىمەلەرى، وتباسى، قۇجاتتارى، مەدالدارى، كۋالىكتەرى جانە باسقا دا مالىمەتتەرى ەنگىزىلدى. وسىلايشا، جەڭىستى جاقىنداتقان جەرلەستەرىمىزدى تاريحتا ماڭگى قالدىرۋعا ءوز ۇلەسىمىزدى قوسۋدى ماقسات تۇتىپ وتىرمىز.

بۇگىنگى كوزى ءتىرى ارداگەرلەرىمىزدىڭ بارلىعىنىڭ جاسى 90-نان اسقان. جاسى كەلسە دە كوشتەن قالماعان كوشەلى جانداردى، ادەتتە، سۇيەگى اسىل دەپ اسپەتتەيمىز. ماحمۋد ەسىمدى قاريا دا قازىرگە دەيىن ءتۇرلى مەرەكەلىك شارالاردان قالماي، ومىراۋى وردەن، مەدالدارعا تولى كوستيۋمىن كيىپ بارىپ، جاستارعا ءوز باسىنان وتكەرگەن ءومىر ساباقتارىنان ونەگەلى اڭگىمە شەرتىپ قايتادى. وسىنداي ءجۇرىس-تۇرىسى شيراق، ءسوز ساپتاۋى ورنىقتى قاريالارىمىز بيىلعى جەڭىس پارادىندا دا ساپتا جۇرۋگە قاۋقارى بارىنا كوزىمىز جەتتى،-دەيدى جامبىل وبلىسى اكىمدىگىنىڭ مادەنيەت، ارحيۆتەر جانە قۇجاتتاما باسقارماسى باسشىسىنىڭ ورىنباسارى سارا مادييەۆا.

سۇراپىل سوعىستىڭ نەبىر قيىن ساتتەرىن ەسىنە العان قاريالاردىڭ ەستەلىكتەرىن ەستىگەندە كوزىڭىزگە ەرىكسىز جاس كەلەدى. راسىندا دا بۇل كىسىلەر قانداي دا بولسا قۇرمەتكە ابدەن لايىق. وسى ورايدا قازىرگى جاھاندانۋ زامانىندا الەۋمەتتىك جەلى ارقىلى باتىر بابالارىمىزدىڭ ەرلىكتەرىن پاش ەتۋگە دە مول مۇمكىندىك تۋىپ وتىر.

سوعىس جىلدارى وق پەن وتتىڭ اراسىندا قان كەشكەن مايدانگەرلەردىڭ ەرلىگى ەشقاشان ۇمىتىلمايدى.