باس پروكۋراتۋرانىڭ باسپا ءسوز قىزمەتى حابارلاۋىنشا، جول ەرەجەسىن بۇزعان شەتەلدىك ءنومىرى بار اۆتوكولىك جۇرگىزۋشىلەرى بۇگىننەن باستاپ ايىپپۇل تولەۋگە مىندەتتى.
سونداي-اق فوتو جانە ۆيدەوفيكساسيا جۇيەسىنە تىركەلگەن زاڭ بۇزۋشىلىقتار ءۇشىن ايىپپۇل تولەۋ تۋرالى نۇسقاما تەك قازاقستاندىق ءنومىرى بار جۇرگىزۋشىلەرگە عانا ەمەس، كولىگى شەتەلدە تىركەلگەن ازاماتتارعا دا كەلەدى.
بۇل جاڭاشىلدىق نۇر-سۇلتان، شىمكەنت، اقمولا، اقتوبە، اتىراۋ، شىعىس قازاقستان، قاراعاندى، قوستاناي، ماڭعىستاۋ جانە پاۆلودار وبلىستارىندا كۇشىنە ەنبەك.
"بۇعان دەيىن مۇنداي مۇمكىندىك بولمايتىن. سەبەبى، زاڭ بۇزۋشىلىقتار تۋرالى نۇسقاما قازاقستاندا تىركەلگەن اۆتوكولىكتىڭ تەحنيكالىق پاسپورتىنداعى جازبانىڭ نەگىزىندە جاسالاتىن"، – دەپ ءتۇسىندىردى باس پروكۋراتۋرا.
ال شەتەلدىك نومىرلەر بويىنشا جۇرگىزۋشىنىڭ جەكە باسىن انىقتاۋ مۇمكىن ەمەس بولعاندىقتان، اكىمشىلىك نۇسقاما جاسالىنبايتىن.
باس پروكۋراتۋرا شەتەلدىك ءنومىرى بار كولىك جۇرگىزۋشىلەرىنىڭ جەكە باسىن انىقتاۋ ءۇشىن اكىمشىلىك پوليسيا كوميتەتى، ۇلتتىق بانك، مەملەكەتتىك كرەديتتىك بيۋرومەن بىرلەسىپ، ۇلكەن جۇمىس جۇرگىزگەن.
پىكىر قالدىرۋ