سوت شىمكەنتتەگى دارىگەردى اقتاۋعا ۇكىم شىعارۋعا مىندەتتى دەپ جازادى Qamshy.kz اقپارات اگەنتتىگى. بۇل تۋرالى جوعارى سوتتىڭ باسپا ءسوز حاتشىسى ايدوس سادۋاقاسوۆ فەيسبۋكتەگى پاراقشاسىندا حابارلادى. 

"قىلمىستىق سوت تورەلىگىندە مىناداي نەگىزگى قاعيدا بار: تاعىلعان ايىپ زاڭدا كوزدەلگەن ءتارتىپ بويىنشا دالەلدەنبەسە، ادام كىناسىز دەپ سانالادى. وسى رەتتە قىلمىستىق كىنانى دالەلدەۋ ايىپتاۋشىنىڭ مىندەتىنە جاتادى.

وسى ءىس بويىنشا سوت تەرگەۋ ورگاندارىنان دارىگەردىڭ كىناسىن راستايتىن جەتكىلىكتى ايعاقتار العان جوق. سوندىقتان دا سوت اقتاۋ ۇكىمىن شىعارۋعا مىندەتتى. زاڭ بويىنشا باسقا شەشىمنىڭ بولۋى مۇمكىن ەمەس. ۇكىم زاڭدى كۇشىنە ەنگەن جوق.

ءجابىرلەنۋشى تاراپ بۇل شەشىمدى جوعارى ساتىلاردا داۋلاۋعا قۇقىلى. وسىعان بايلانىستى سوت ورگاندارى اتىنان ءىستىڭ ءمان-جايىن اشىپ كورسەتەتىن قانداي دا ءبىر كوممەنتاريي بەرۋگە بولمايدى. ونىڭ ۇستىنە اڭگىمە زورلاۋعا قاتىستى بولىپ وتىر. بۇل ساناتتاعى ىستەر سوتتاردا جابىق رەجيمدە قارالادى.

نەلىكتەن ەشكىمگە ءتۇسىندىرۋدىڭ قاجەتى جوق. ويتكەنى بۇل ءىس ونداعى نەگىزگى تۇلعالارعا عانا ەمەس، سونىمەن قاتار ولاردىڭ وتباسىنا، جاقىندارى مەن بالالارىنا دا قاتىستى.

وسى ورايدا ب ا ق وكىلدەرىن، قوعام قايراتكەرلەرى مەن الەۋمەتتىك جەلى قولدانۋشىلارىن تاراپتاردىڭ جەكە ءومىرىنىڭ قۇپياسىنا كولەڭكە تۇسىرەتىن قانداي دا ءبىر جاريالانىم جاساۋدان باس تارتۋعا شاقىرامىن" دەلىنگەن جازبادا. 

ەسكە سالساق، شىمكەنتتە اۋرۋحانالاردىڭ بىرىندە نەفرولوگ دارىگەر «ءوز ارىپتەسىن زورلادى» دەگەن كۇدىككە ىلىنگەن ەدى. زورلىق كورگەن كەلىنشەك ءال-فارابي اۋداندىق ىشكى ىستەر باسقارماسىنا ارىز بەرگەن. الايدا كوپ ۇزاماي قىلمىستىق قۇرام مەن دالەل جوق دەپ ءىس جابىلعان. بۇل تۋرالى «نەمولچي» قوعامدىق قورىنىڭ وكىلدەرى حابارلاعان ەدى. سول تۇرتكى بولىپ، وتكەن ايدا ءىس قايتا قاراۋعا الىنىپ، كۇدىكتى قاماۋعا الىنعان بولاتىن.