قالا تۇرعىندارىنىڭ ءوتىنىشى بويىنشا «بيۋدجەتكە قاتىسۋ» پيلوتتىق جوباسى بويىنشا وتىنىمدەر قابىلداۋ 27 قازانعا دەيىن ۇزارتىلدى. داۋىس بەرۋ كەزەڭى 3-12 قاراشا ارالىعىندا وتەدى. الماتى قالاسىنىڭ تۇرعىندارى ءۇشىن بۇل – budget.open-almaty.kz سايتىندا ءوز اۋداندارىن دامىتۋ بويىنشا جوبالىق ۇسىنىستاردى بەرۋ نەمەسە بۇرىن بەرىلگەن جوبالىق ۇسىنىستاردى پىسىقتاۋ مۇمكىندىگى.

بۇگىندە «بيۋدجەتكە قاتىسۋ» پيلوتتىق جوباسى اياسىندا قالا تۇرعىندارى 231 ءوتىنىم بەردى. بەرىلگەن جوبالىق ۇسىنىستار سانى بويىنشا المالى (67)، مەدەۋ (49) جانە بوستاندىق (39) اۋداندارى كوش باستاپ تۇر. بارلىق جوبالارمەن budget.open-almaty.kz سايتىندا، «جوبالىق ۇسىنىستار سانى» بولىمىندە تانىسۋعا بولادى.

28 قاراشادا جوبالىق ۇسىنىستاردى جيناۋ كەزەڭىنىڭ قورىتىندىسى بويىنشا بارلىق اۋداندىق اكىمدىكتەر جانىنان قۇرىلعان ساراپتاۋ كوميسسيالارى قالا تۇرعىندارىنىڭ يدەيالارىن جوبا تالاپتارىنا سايكەستىگىنە باعالايدى، سونداي-اق الدىن الا قول جەتكىزۋ حاتتامالارىن قالىپتاستىرادى. 29 قازان-01 قاراشا ارالىعىندا جوبالار پىسىقتالعاننان كەيىن، budget.open-almaty.kz سايتىندا قول جەتكىزۋدىڭ قورىتىندى حاتتامالارى جاريالانادى.

ىسكە اسىرۋعا رۇقسات بەرۋ ءۇشىن جوبا الماتى تۇرعىندارىنىڭ 10-نان استام داۋىسىن جيناۋى ءتيىس. قالانىڭ ءبىر تۇرعىنى ءۇش جوبالىق ۇسىنىسقا داۋىس بەرۋگە قۇقىلى.

تۇرۋ اۋدانىنا قاراماستان، ۇناعان جوبالاردى تاڭداپ، وعان داۋىس بەرۋدىڭ ەكى ءادىسى بار:

• ونلاين، ەسق پايدالانا وتىرىپ، budget.open-almaty.kz سايتىندا؛

• Open Almaty فرونت-كەڭسەسىندە (اباي د-لى، 90، ايمانوۆ ك-سىنىڭ قيىلىسى)، جەكە باسىن كۋالاندىراتىن قۇجاتتى ۇسىنا وتىرىپ، قاعاز تۇرىندە داۋىس بەرۋ.