قاسىم-جومارت توقايەۆ الەم تەننيسىنىڭ جۇلدىزدارى رافاەل نادال مەن نوۆاك دجوكوۆيچپەن كەزدەستى دەپ حابارلايدى Qamshy.kz اقپارات اگەنتتىگى اقوردا سايتىنا سىلتەمە جاساپ.
مەملەكەت باسشىسى اتاقتى تەننيسشىلەردى "اقوردا" رەزيدەنسياسىندا قابىلداپ، رافاەل نادال مەن نوۆاك دجوكوۆيچكە قازاقستانعا كەلگەندەرى جانە قايىرىمدىلىق ماچىنا قاتىساتىندارى ءۇشىن ريزاشىلىعىن ءبىلدىردى.
"بۇل - قازىرگى زاماننىڭ داڭقتى تەننيسشىلەرىنىڭ ويىنىن قازاقستاندا كورۋگە كەرەمەت مۇمكىندىك. اتالعان ماچتىڭ قايىرىمدىلىق ماقساتتا ءوتىپ وتىرعانى اسا ماڭىزدى. سىزدەردىڭ استانامىزعا كەلگەندەرىڭىز قازاقستاندا دامىپ كەلە جاتقان تەننيسكە ۇلكەن قولداۋ ەكەنى داۋسىز. بۇگىنگى بالالارعا كورسەتەتىن شەبەرلىك ساباقتارىڭىز ولارعا جاقسى ۇلگى بولادى جانە شابىتتاندىرادى دەپ سەنەمىن"، - دەدى قاسىم-جومارت توقايەۆ.
قازاقستانداعى تەننيستىڭ دامۋىنا جوعارى باعا بەرگەن رافاەل نادال مەن نوۆاك دجوكوۆيچ پرەزيدەنتكە كەزدەسۋگە مۇمكىندىك جاساعانى جانە تەننيسكە كورسەتىپ وتىرعان قولداۋى ءۇشىن العىستارىن ايتتى. "بۇل مەنىڭ قازاقستانعا ءۇشىنشى رەت كەلۋىم. ءار كەلگەن سايىن اسەم ەلوردانىڭ كەلبەتىنەن راحات تابامىن. دەگەنمەن بۇل جولعى ساپارىم ەرەكشە. ويتكەنى عاجاپ "اقوردا" سارايىندا وزىڭىزبەن كەزدەسۋگە مۇمكىندىك الدىم"، - دەپ اتاپ ءوتتى رافاەل نادال.
"پرەزيدەنت مىرزا، قازاقستاندا تەننيسكە كورسەتكەن قولداۋىڭىز ءۇشىن العىسىمدى بىلدىرگىم كەلەدى. ءبىز ەلدەرىڭىزدە تەننيستىڭ ناسيحاتتالۋىنا جانە دامۋىنا ءوز ۇلەسىمىزدى قوساتىنىمىزعا قۋانىشتىمىز، - دەدى نوۆاك دجوكوۆيچ.
قاسىم-جومارت توقايەۆ سپورتشىلارعا تابىس تىلەپ، رافاەل ءنادالدى شاڭىراق كوتەرۋىمەن قۇتتىقتادى.
پىكىر قالدىرۋ