ۇلتتىق بانك ءتوراعاسىنىڭ ورىنباسارى ءمادينا ءابىلقاسىموۆانىڭ ايتۋىنشا، ينفلياسيا دەڭگەيىن 2020-2021 جىلدارى –  4-6 پايىز، 2022 جىلدان باستاپ 3-5 پايىز دالىزىندە ساقتاۋ كوزدەلىپ وتىر، – دەپ Qamshy.kz اقپارات اگەنتتىگى حابارلايدى.

"ۇلتتىق بانكتىڭ اقشا-نەسيە ساياساتىنىڭ نەگىزگى ماقساتى – باعا تۇراقتىلىعىن قامتاماسىز ەتۋ. ينفلياسيا بويىنشا 2020-2021 جىلدارعا ارنالعان ماقسات 4-6 پايىزدىق، 2022 جىلدان باستاپ 3-5 پايىزدىق دالىزدە بەلگىلەندى. ۇلتتىق بانكتىڭ بازالىق مولشەرلەمەسى اقشا-نەسيە ساياساتىنىڭ نەگىزگى قۇرالى بولىپ قالادى. ۇلتتىق بانك بازالىق مولشەرلەمەنىڭ دەڭگەيىن ەلدەگى قالىپتاسقان جانە كۇتىلەتىن ينفلياسيانىڭ مولشەرىنە قاتىستى، سونداي-اق سىرتقى فاكتورلاردى ەسكەرە وتىرىپ بەلگىلەيدى. بۇل رەتتە ونىڭ دەڭگەيى ناقتى كورسەتۋدە 3-3،5 پايىزدىق دەڭگەيدە ساقتالادى"، – دەدى م.ءابىلقاسىموۆا پارلامەنت سەناتىنىڭ قارجى جانە بيۋدجەت كوميتەتى وتىرىسىنداعى "2020-2022 جىلدارعا ارنالعان رەسپۋبليكالىق بيۋدجەت تۋرالى" زاڭ جوباسىنىڭ تانىستىرىلىمىندا.

"ۇلتتىق بانكتىڭ باعالاۋىنشا، ينفلياسيا وسى جىلدىڭ قورىتىندىسى بويىنشا 5،7-5،8 پايىزدىق دەڭگەيدە قالىپتاسادى. 2020 جىلى 4-6 پايىزدىق نىسانالى ءدالىز ىشىندە ساقتالا وتىرىپ، ينفلياسيا ءبىرشاما تومەندەيدى دەپ كۇتىلەدى"، – دەدى ۇلتتىق بانك ءتوراعاسىنىڭ ورىنباسارى.