بۇگىن نۇر-سۇلتان مەن الماتى قالاسىندا  زاڭسىز شەرۋ وتكىزۋگە تىرىسقاندار بولدى. بۇل جايىندا ق ر ىشكى ىستەر مينيسترلىگىنىڭ باسپا ءسوز قىزمەتى ءمالىم ەتتى، – دەپ Qamshy.kz اقپارات اگەنتتىگى حابارلايدى.

"26 قازاندا نۇر-سۇلتان مەن الماتى قالالارىندا رۇقسات ەتىلمەگەن ميتينگ وتكىزۋگە تىرىسقاندار بولدى. باس پروكۋراتۋرانىڭ زاڭسىز ميتينگ تۋرالى بىرنەشە مارتە ەسكەرتۋىنە قاراماستان كەي ازاماتتار زاڭ تالابىن ورىنداۋدان باس تارتتى. قازىرگى ۋاقىتتا پوليسياعا ءمان-جايدى انىقتاۋ جانە اكىمشىلىك جاۋاپكەرشىلىككە تارتۋ ماسەلەسىن قاراستىرۋ ءۇشىن 26 ادام جەتكىزىلدى. ىشكى ىستەر مينيسترلىگى قۇقىق بۇزۋشىلىقتىڭ الدىن الۋ ماقساتىندا ازاماتتارى ارانداتۋشىلىق ۇندەۋلەرگە ەرمەي، ەكسترەميستىك ۇيىمنىڭ زاڭسىز اكسيالارىنا قاتىسپاۋعا شاقىرادى"، – دەپ حابارلادى باسپا ءسوز قىزمەتى.

ىشكى ىستەر مينيسترلىگى ازاماتتاردى ارانداتۋشىلىققا بوي الدىرماي، ەكسترەميستىك ۇيىمنىڭ زاڭسىز اكسيالارىنا قاتىسپاۋعا شاقىردى.

ەسكە سالساق، كەشە باس پروكۋراتۋرا "قازاقستاننىڭ دەموكراتيالىق تاڭداۋى" ەكسترەميستىك ۇيىمىنىڭ نارازىلىق اكسيالارىن ۇيىمداستىرۋشىلار مەن وعان قاتىسۋشىلارعا زاڭمەن بەلگىلەنگەن تارتىپتە قاتاڭ شارالار قولدانىلاتىنىن حابارلاعان ەدى.

باس پروكۋراتۋرانىڭ حابارلاۋىنشا، زاڭسىز اكسيالارعا قاتىسۋ فاكتىلەرى راستالعان جاعدايدا اكىمشىلىك قۇقىق بۇزۋشىلىقتار تۋرالى كودەكستىڭ 488-بابى بويىنشا جاۋاپكەرشىلىك قاراستىرىلعان (50 اەك-كە دەيىن ايىپپۇل (126 150 تەڭگە)، 15 تاۋلىككە دەيىن قاماققا الۋ).

ال قىلمىستىق كودەكستىڭ 400-بابى بويىنشا 200 ايلىق ەسەپتىك كورسەتكىشكە دەيىن (505 مىڭ تەڭگە) ايىپپۇل نەمەسە 50 تاۋلىككە دەيىن قاماۋعا الۋ جازاسى بەلگىلەنگەن.