نۇر-سۇلتان قالاسىنىڭ اكىمى التاي كولگىنوۆ بەلسەندى تۇرعىندار، قوعامدىق ۇيىمدار مەن قالا اكىمدىگىنىڭ قۇرىلىمدارىن بىرىكتىرەتىن ءبىرىڭعاي پلاتفورمانىڭ جۇمىسىن قورىتىندىلادى، –دەپ Qamshy.kz اقپارات اگەنتتىگى حابارلايدى. بۇل تۋرالى ول فەيزبۋك پاراقشاسىندا جازدى.
اكىمنىڭ ايتۋىنشا، ەلوردانىڭ اكسەلەراتورى ىسكە قوسىلعانىنا ەكى اي بولعان.
"العاشقى ناتيجەلەرگە توقتالار بولسام، تۇرعىندار پاتەر يەلەرىنىڭ كووپەراتيۆتەرىنىڭ جۇمىسىنا قاتىستى كوبىرەك شاعىمدانعان. ياعني، ولاردىڭ قىزمەت كورسەتۋ ساپاسى تۇرعىن حالىقتى قاناعاتتاندىرمايدى. پاتەر يەلەرىنەن ءتۇرلى قاجەتتىلىكتەر ءۇشىن جينالاتىن قاراجاتتىڭ جۇمسالۋى ءالى دە بولسا باسى اشىق ماسەلە"، – دەيدى ول.
ءوز سوزىندە پاتەر يەلەرىنىڭ كووپەراتيۆتەرى – ءوزىن-وزى باسقارۋ ينستيتۋتى بولىپ ەسەپتەلەتىندىگىن ايتتى.
"پاتەر يەلەرى ءۇيدى باسقارۋدى كىمگە تاپسىراتىندىعىن تاڭداۋعا، وزدەرى تاڭداعان قىزمەت كورسەتۋشىلەرمەن شارتتار جاساسۋعا قۇقىلى. جاڭا سيفرلىق تەحنولوگيالار جۇمىستىڭ اشىقتىعىن قامتاماسىز ەتەدى. ماسەلەن، ە-پيك ءموبيلدى قوسىمشاسى. جاقىندا پاتەر يەلەرىنىڭ كووپەراتيۆتەرى اسسوسياسيالارى مەن ۇكىمەتتىك ەمەس ۇيىمداردىڭ وكىلدەرىمەن كەزدەستىم. الداعى ۋاقىتتا پاتەر يەلەرى كووپەراتيۆتەرىنىڭ جۇمىسىن جەتىلدىرۋگە ارنالعان جوبالاردى بىرلەسە ىسكە اسىرامىز"، – دەپ جازدى اكىم.
پاتەر يەلەرى كووپەراتيۆتەرىنىڭ جۇمىسىن جەتىلدىرۋدەن باسقا اكسەلەراتور باعدارلاماسىنىڭ تاعى ەكى باعىتى بار.
"ەكىنشىسى – قالانى سانيتارلىق تازالاۋ. ماسەلەن، الداعى قىس مەزگىلىندە قار تازالاۋ، مۇزداردى جيناۋ. سونداي-اق نوسەر كارىزدەرىنىڭ جۇمىسى، اشىق ليۋكتەر، سىنعان پليتكالار، وسى سالاداعى قىزمەتتەردى تاريفتەۋ ماسەلەلەرى ت. ب."، – دەدى كولگىنوۆ.
ءۇشىنشى باعىت – قوعامدىق كولىك ماسەلەلەرى.
"بۇل باعىت بويىنشا قىزمەت كورسەتۋ ساپاسى، تولەم جۇيەسى، جۇرگىزۋشىلەردى ىنتالاندىرۋ بويىنشا شارالار، مارشرۋتتىق باعىتتار جانە ت.ب. قارالادى. اكسەلەراتوردىڭ باستى مىندەتى – وسى 3 باعىتتىڭ وزەكتى ماسەلەلەرىن شەشۋ"، – دەپ قورىتىندىلادى قالا اكىمى.
سونداي-اق ا.كولگىنوۆ پاتەر يەلەرىنىڭ كووپەراتيۆتەرى، قوعامدىق كولىك پەن قالانى سانيتارلىق تازالاۋ جۇمىستارىن جاقسارتۋ نەمەسە ترانسفورماسيالاۋ بويىنشا يدەيالار مەن ۇسىنىستار بولسا، اكسەلەراتور سايتىنا جازىلۋعا كەڭەس بەردى.
پىكىر قالدىرۋ