قازاقستان پرەزيدەنتى قاسىم-جومارت توقايەۆ ماس كۇيدە كولىك جۇرگىزگەندەر ءۇشىن جازانى قاتاڭداتۋدى تاپسىردى دەپ حابارلايدى Qamshy.kz اقپارات اگەنتتىگى. بۇل تۋرالى توقايەۆ Twitter جەلىسىندەگى پاراقشاسىندا جازدى.

"زاڭعا وزگەرتۋلەر ەنگىزۋدى تاپسىردىم: الكوگولدى ىشىمدىكتەردىڭ كەز-كەلگەن ءتۇرىن ىشكەن كۇيىندە كولىك جۇرگىزگەنى ءۇشىن، سونداي-اق مال ۇرلىعى ءۇشىن بەرىلەتىن جازانى قاتاڭداتۋ قاجەت"، - دەدى قاسىم-جومارت توقايەۆ.

مۇنداي جاعدايدا تومەندەگىدەي جازا قاراستىرىلعان. 

اكىمشىلىك قۇقىق بۇزۋشىلىق تۋرالى كودەكستىڭ 608ء-شى بابىنا سايكەس، الكوگولدى ىشىمدىك ءىشىپ، ەسىرتكى قولدانعان سوڭ كولىك تىزگىنىنە وتىرعانى ءۇشىن ەڭ جەڭىل جازا - ءۇش جىلعا كولىك باسقارۋ قۇقىعىنان ايىرۋ. 

ەگەر جۇرگىزۋشى سالدارىنان جول اپاتى بولسا، بۇل قۇقىقتان ءتورت جىلعا ايىرىلادى. ادام دەنساۋلىعى مەن وزگە كولىكتەرگە زاقىم كەلتىرسە، بۇل جازانى بەس جىلعا ۇزارتۋ قاراستىرىلعان. 

قۇقىق بۇزۋشىلىق قايتالانسا، مەرزىم ۇزارتىلادى. بۇدان بولەك، جۇرگىزۋشى 15-تەن 30 تاۋلىككە دەيىن قاماۋعا الىنۋى مۇمكىن.