مەملەكەت باسشىسى قاسىم-جومارت توقايەۆ الماتى قالاسىنا ەكى كۇندىك جۇمىس ساپارمەن كەلدى. ق.توقايەۆتىڭ ساپارى الماتى قالاسىن دامىتۋ ماسەلەلەرى جونىندەگى كەڭەس وتىرىسىنان باستالدى. بۇل تۋرالى پرەزيدەنتتىڭ باسپا ءسوز حاتشىسى بەرىك ءۋالي facebook-تەگى پاراقشاسىندا مالىمدەدى.

– مۇندا ەل تاعدىرىنا قاتىستى ماڭىزدى ءارى تاريحي شەشىمدەر قابىلداندى. اتا زاڭىمىز، مەملەكەتتىك رامىزدەر، ۇلتتىق ۆاليۋتامىز وسىندا بەكىتىلدى. بۇگىندە الماتى ءبىلىم، عىلىم، مادەنيەت جانە ىسكەرلىك ورتالىعى رەتىندە دامىپ كەلەدى. سوڭعى جىلدارى قالاعا جاڭا اۋماقتار قوسىلىپ، كولەمى 2 ەسەگە ۇلعايدى. حالقىنىڭ سانى 20 پايىزعا ءوسىپ، ءبىر ميلليون سەگىز ءجۇز مىڭ ادامعا جەتتى. قالادا باسقا وڭىرلەردەن كەلگەن جانە وسى توڭىرەكتە تۇراتىن جارتى ميلليونعا جۋىق ادام جۇمىسپەن قامتىلىپ وتىر، – دەدى ق.توقايەۆ.

مەملەكەت باسشىسى بۇگىنگى تاڭدا ىشكى جالپى ءونىمىنىڭ ۇشتەن ءبىرى الماتى جانە نۇر-سۇلتان قالالارىنا تيەسىلى ەكەنىنە نازار اۋداردى.

– الماتى تاۋەلسىزدىك جىلدارى ءىرى ەكونوميكالىق ورتالىققا جانە رەسپۋبليكالىق بيۋدجەتتىڭ دونورىنا اينالدى. شاھار ىشكى جالپى ءونىمنىڭ بەستەن ءبىرىن، مەملەكەتتىك بيۋدجەتكە تۇسەتىن ءتۇسىمنىڭ 20 پايىزدان استامىن جانە بانكتەر بەرەتىن نەسيەنىڭ 60 پايىزىن قامتاماسىز ەتىپ وتىر. سونداي-اق، ەلىمىزدەگى كوتەرمە جانە بولشەك ساۋدانىڭ 40 پايىزدان استامى، سىرتقى ساۋدا اينالىمىنىڭ 15 پايىزعا جۋىعى وسى قالادا جۇرگىزىلەدى. قالا ينۆەستورلار ءۇشىن قولايلى ءىرى وڭىرلىك ورتالىققا اينالدى. ءقازىر الماتىدا بانكتەردىڭ، حالىقارالىق ۇيىمدار مەن ترانسۇلتتىق كومپانيالاردىڭ باس كەڭسەلەرى ورنالاسقان.

پرەزيدەنت ساپار اياسىندا "جاڭا الماتى" باعدارلاماسىنىڭ تۇساۋكەسەرىمەن تانىسىپ، "بالالار ءۇيىنىڭ" تاربيەلەنۋشىلەرىنە پاتەر كىلتتەرىن تابىس ەتىپ، الماتى قالاسىنىڭ الەۋمەتتىك-ەكونوميكالىق دامۋىنا ارنالعان كەڭەسكە قاتىسادى.

سونىمەن قاتار «Tech Garden» يننوۆاسيالىق كلاستەرىنىڭ جۇمىسىمەن، ينۆەستيسيا ءۇيىنىڭ تىنىس-تىرشىلىگىمەن تانىسادى. بۇدان بولەك ءال-فارابي اتىنداعى قازاق ۇلتتىق ۋنيۆەرسيتەتىنە بارىپ، وندا وقۋ كورپۋسى مەن "كەرەمەت" ستۋدەنتتەرگە قىزمەت كورسەتۋ ورتالىعىندا بولادى.