24 ماۋسىمدا ارىس قالاسىندا اسكەري قويما جارىلىپ قالا حالقى قيىن جاعدايدا قالعان بولاتىن. رەسپۋبليكانىڭ تۇكپىر-تۇكپىرىنەن كومەككە اسىققان قازاقستان جۇرتى ارىس حالقىنا ۇلكەن قولداۋ ءبىلدىردى. سونداي ىزگى ءىستىڭ ءبىرىن تۇركىستان وبلىسىنىڭ تۋماسى، كاسىپكەر نۇركەن جارىلعاپ ۇلى اتقاردى. ول ارىستىق 10 بالانىڭ جوعارى وقۋ ورنىنا ءتۇسىپ، 4 جىل بويى تەگىن وقىپ شىعۋىنا مۇمكىندىك بەردى.
ۇشەم ستۋدەنتتىڭ ارمانى اسقاق
استانا حالىقارالىق ۋنيۆەرسيتەتىنە ارىس قالاسىنان كەپ وقىپ جاتقان اعايىندا (ۇشەم) ستۋدەنتتەر. زاۋر، زارينا جانە زامير.
استانا حالىقارالىق ۋنيۆەرسيتەتىنىڭ 1 كۋرس ستۋدەنتتەرى زاۋر، زارينا جانە زامير زۇلىپحاروۆتار ارىس قالاسىنان بيىل كەلگەن. اعايىندى (ۇشەم) ستۋدەنتتەردىڭ ءارقايسى ءوز سالاسىنىڭ مامانى بولۋدى ارماندايدى. زارينا ءىز كەسۋشى بوپ ىشكى ىستەر سالاسىندا ەڭبەك ەتكىسى كەلەدى. ال، زاۋر پايدالى سايتتار مەن باعدارلامالار جاسايتىن بىلىكتى IT مامانى بولۋدى قالايدى. زاميردىڭ ارمانى Google كومپانياسىندا قىزمەت ەتۋ.
بىلىمگە ينۆەستيسيا قۇيۋ شەتەلدە تاڭسىق ەمەس
استانا حالىقارالىق ۋنيۆەرسيتەتىنىڭ رەكتورى سەرىك ازتاي ۇلى ىرسالييەۆ
“ارىستا بولعان جاعدايدان ءبارىمىز حاباردارمىز. حالىق ۇلكەن قولداۋعا مۇقتاج بولدى. كاسىپكەر رەتىندە ءبىر وقپەن ەكى قويان اتتىڭىز. كومەككە مۇقتاج جانداردىڭ قاجەتىن وتەدىڭىز جانە جاس بۋىننىڭ ساپالى ءبىلىم الۋى ءۇشىن مۇمكىندىك اشتىڭىز. جاستار جانە جاڭا ۋنيۆەرسيتەت ءۇشىن ۇلكەن قولداۋ كورسەتتىڭىز. بۇل – الەمدىك تاجىريبە. الەمدە بىلىمگە ينۆەستيسيا قۇيۋ دامىعان. قازاقستاندا بۇل ءۇردىس ەندى دامىپ كەلە جاتىر. كورسەتكەن ازاماتتىعىڭىز ءۇشىن سىزگە ۇلكەن العىس بىلدىرەمىن”، – دەدى سەرىك ىرسالييەۆ كاسىپكەر نۇركەن جارىلقاپۇلىنا.
استانا حالىقارالىق ۋنيۆەرسيتەتىنىڭ رەكتورى سەرىك ىرسالييەۆتىڭ ايتۋىنشا، پەداگوگ دايىنداۋ جونىندە ۋنيۆەرسيتەتكە ەڭ ۇلكەن قولداۋدى “ءبىلىم-يننوۆاسيا” حالىقارالىق قوعامدىق قورى كورسەتىپ جاتىر.
“وزدەرىڭىز بىلەسىزدەر “ءبىلىم-يننوۆاسيا” حقق-نا قازاقستاننىڭ ەڭ ۇزدىك مەكتەپتەرى كىرەدى. ءۇشتىلدى وقىتۋشىلار، دامىعان ادىس-تاسىلدەر، اعىلشىن تىلىندەگى ۇزدىك وقۋلىقتار بارلىعى وسى بيل-دىڭ ءبىر ءوزى اتقارىپ وتىرعان شارۋا”، – دەدى رەكتور.
سونىمەن قاتار، ستۋدەنتتەرگە “4 جىلدان كەيىن وقۋدى ءتامامداپ قازاقستاننىڭ بولاشاعىنا پايدالى مامان اتانىپ شىعاسىڭدار دەگەن سەنىمدەمىن”، – دەدى.
ارىستىق 10 بالاعا گرانت تاعايىنداعان كاسىپكەر كىم؟
كاسىپكەر نۇركەن جارىلقاپ ۇلى
اسانوۆ نۇركەن جارىلقاپ ۇلى 1980 جىلى 25 مامىر كۇنى تۇركىستان وبلىسى، شاردارا اۋدانى، قىزىلقۇم ەلدى مەكەنىندە تۋعان. 1997-2001 جىلدارى الماتى قالاسىنداعى ءال-فارابي اتىنداعى قازاق ۇلتتىق ۋنيۆەرسيتەتىندە “حالىقارالىق ەكونوميكالىق قاتىناستار” ماماندىعى بويىنشا ءبىلىم العان. 2002-2004 جىلدارى گەرمانيانىڭ فرايبۋرگ قالاسىنداعى “ۆۋپپەرتال” ۋنيۆەرسيتەتىندە “حالىقارالىق باسقارما” ماماندىعى بويىنشا ءبىلىمىن جەتىلدىرگەن. 2014-2016 جىلدارى شۆەيساريانىڭ “يۋبيس” ۋنيۆەرسيتەتىندە “مۆا” ماماندىعى بويىنشا ءبىلىم العان.
كاسىپكەر نۇركەن جارىلقاپ ۇلى ارىس قالاسىنان استانا حالىقارالىق ۋنيۆەرسيتەتىنە كەلىپ وقىپ جاتقان ستۋدەنتتەرمەن.
نۇركەن جارىلقاپ ۇلى وقۋ ورنىنداعى ارىستىق ستۋدەنتتەرمەن كەزدەسىپ، اعالىق اقىلىن ايتتى. ستۋدەنتتەرگە ءبىلىمنىڭ ماڭىزدىلىعىن ءتۇسىندىرىپ، ساپالى مامان اتانۋعا تىلەكتەستىك ءبىلدىردى.
استانا حالىقارالىق ۋنيۆەرسيتەتى تۋرالى نە بىلەمىز؟
جوعارى وقۋ ورنى رەكتورىنىڭ ايتۋىنشا استانا حالىقارالىق ۋنيۆەرسيتەتى قازاقستاننىڭ ءبىرىنشى پرەزيدەنتى نۇرسۇلتان نازاربايەۆتىڭ تىكەلەي جوباسى. 7 باعىت بويىنشا ساپالى مامان دايارلاۋ جوعارى وقۋ ورنىنىڭ باستى ميسسياسى.
“ۋنيۆەرسيتەتىمىزدىڭ اشىلعانىنا 2 جىل بولدى. وتكەن جىلى 200-گە جۋىق ماگيسترانتتار ءبىتىرىپ شىقتى. ءقازىر، ۋنيۆەرسيتەتىمىزدە 350 ستۋدەنت ءبىلىم الىپ جاتىر. ولاردىڭ ىشىندە 300-دەن اسا باكالاۆريات، قالعانى ماگيستراتۋرا بىلىمگەرلەرى”، – دەدى استانا حالىقارالىق ۋنيۆەرسيتەتىنىڭ الەۋمەتتىك جانە تاربيە باعىتىنداعى ۆيسە-پرەزيدەنتى ءالىمجان بەكەجان ۇلى.
يگەنبايەۆ ءالىمجان بەكەجان ۇلى. استانا حالىقارالىق ۋنيۆەرسيتەتىنىڭ الەۋمەتتىك جانە تاربيە باعىتىنداعى ۆيسە-پرەزيدەنتى جوعارى ءبىلىم بەرۋ مەكتەبى پەداگوگيكالىق فاكۋلتەتىنىڭ دەكانى.
“بيىل باكالاۆرعا تۇسكەن 10 ستۋدەنت ارىس قالاسىندا زارداپ شەككەن وتباسىلاردىڭ بالالارى. مەسەنات اسانوۆ نۇركەن جارىلقاپ ۇلى ارنايى 10 بالاعا جاردەماقى تاعايىنداعان بولاتىن. سول بالالار قۇقىق، پەداگوگيكا جانە IT سالاسى بويىنشا بىلىممەن قوسا شاكىرتاقى دا الىپ جاتىر. ارىستاعى ارنايى وكىلدەرىمىز كونكۋرس ارقىلى جاعدايى كەلمەيتىن، مۇمكىندىگىنشە كوپبالالى وتباسىنان شىققان 10 بالانى ىرىكتەپ الدى. سونىمەن قاتار ۇبت-دا جيناعان ۇپايلارىن دا ەسكەردىك. نۇركەن اسانوۆ ەل بولاشاعىنىڭ جاناشىرى عوي. ارىستاعى حالىقتىڭ جاعدايىنا الاڭداپ، جاستار ساپالى ءبىلىم السىن، بولاشاعى جارقىن بولسىن دەپ وسىنى ءوز موينىنا الدى. جاقسى ءىستىڭ باستاۋى دەپ ويلايمىن”، – دەدى ءالىمجان بەكەجان ۇلى.
“بارىمىزگە بەلگىلى قوعامدا مۇعالىمدەردىڭ تاپشىلىعى بار. جىلىنا استانا قالاسىنىڭ وزىنە 850-گە جۋىق ءمۇعالىم قاجەت. استانا حالىقارالىق ۋنيۆەرسيتەتى الداعى جىلدارى ەلوردانى پەداگوگيكا ماماندارىمەن قامتاماسىز ەتۋدى جوسپارلاپ جاتىر. بىزدە استانا قالاسى اكىمدىگىنىڭ قولداۋىمەن 200-دەي بالا گرانتپەن وقىپ جاتىر. 50 شاقتى ماگيسترانتتىڭ 36-سى مەملەكەتتىك گرانتپەن ءبىلىم الۋدا”، – دەپ اتاپ ءوتتى AIU ۆيسە-پرەزيدەنتى.
ءابدىماناپ كەڭەس
Kazaknews.kz
پىكىر قالدىرۋ