پوليسەيلەر شىمكەنتتەگى  اتىستى كىم شىعارعانىن انىقتادى – دەپ Qamshy.kz اقپارات اگەنتتىگى حابارلايدى، "كتك" تەلەارناسىنا سىلتەمە جاساپ.

شىمكەنتتەگى «سۇندەت» كافەسىندە بولعان اتىس سالدارىنان ءبىر ادام كوز جۇمىپ، بەس ادام زارداپ شەكتى. ال تورتەۋى ءالى اۋرۋحانادا جاتىر. پوليسيا قارۋلى شابۋىل ۇيىمداستىرعان ەكى ادامنىڭ كىم ەكەنىن انىقتادى. الايدا، ولار ءالى ۇستالعان جوق.

شىمكەنت قالاسى پوليسيا دەپارتامەنتىنىڭ باسشىسى ەرالى جۇماحانبەتوۆتىڭ ايتۋىنشا، اتىس ۇيىمداستىرعانداردىڭ اراسىندا بۇعان دەيىن سوتتالعاندار دا بار،

"كۇدىكتىلەر بار، كىمنىڭ وق اتقانى انىقتالدى. ءقازىر بۇعان نە سەبەپ بولعانى تەكسەرىلىپ جاتىر. اراسىندا بۇعان دەيىن سوتتالعاندار دا بار. بۇل نەبارى ءبىر تاۋلىكتىڭ ىشىندە جۇرگىزىلگەن جۇمىس ناتيجەسى. قارۋ تاركىلەندى "، – دەدى ول.

قىلمىستىق ىسكە قاتىستى پوليسەيلەر قىلمىسقا كولىكتە تابىلعان قوماقتى اقشانىڭ قانداي قاتىسى بار ەكەنىن دە انىقتاپ جاتىر.

سونداي-اق  تەڭگە جانە دوللارمەن ساقتالعان قاراجات كافە ماڭىندا تۇرعان كولىكتەردىڭ بىرىنەن تابىلعان بولاتىن.

قازىرگى تاڭدا زارداپ شەككەن ەكى ادام ءالى جانساقتاۋ بولىمىندە جاتىر. ال ەكەۋىنە دە وق تيگەن.

"ءتورت ەر ادام اۋرۋحاناعا جەتكىزىلدى. بارىنە وق تيگەن، جاعدايى اۋىر. ەكى ادامعا وتا جاسالدى. ال ەكەۋى حيرۋرگيا جانە تراۆماتولوگيا بولىمىنە اۋىستىرىلدى. بەسىنشى ادام دارىگەرلەر تەكسەرگەن سوڭ بىردەن ۇيىنە جىبەرىلدى"، – دەدى №1 شىمكەنت اۋرۋحاناسىنىڭ ءبولىم باسشىسى وتكىرجان مولداحانوۆ.

پوليسيا زارداپ شەككەندەر مەن وق اتقان ادامداردىڭ بىر-بىرىمەن تانىستىعىن انىقتاۋدا. ودان وزگە تەرگەۋشىلەر قارۋدى ساراپتاماعا جىبەردى. قاسكويلەر ونى وقيعا ورنىنان 300 مەتر جەردە لاقتىرىپ كەتكەن.

قىلسىستىق ءىس ادام ءولتىرۋ جانە زاڭسىز قارۋ ساقتاۋ باپتارى بويىنشا تەرگەلىپ جاتىر.