ۇلت جوسپارى بەس ينستيتۋسيونالدىق رەفورمانى جۇزەگە اسىرۋ جونىندەگى 100 ناقتى قادامنىڭ II -تاراۋى تۇگەلدەي سوت جانە قۇقىق جۇيەسىنە ارنالعان. بۇل دۇرىس تا شىعار. ويتكەنى ۇلت جوسپارىندا سوت سالاسى تۇتاستاي رەفورمالانۋى كەرەكتىگى ايتىلعان. ال 100 ناقتى قادام ۇلت جوسپارىندا اتاپ كورسەتىلگەن تاپسىرمالار سوڭعى جىلدارى قالاي جۇزەگە اسىپ جاتىر؟ سۋديالاردىڭ قىزمەتى نەمەسە كىمدەر سۋديا بولا الادى، بۇل سالاداعى سۋديالاردىڭ بىلىكتىگىن قالاي ارتتىرۋعا بولادى؟  ەلىمىزدەگى  سۋديالار مەن سوت پروسەستەرىندە قانداي وزگەرىستەر ورىن الدى؟ ادىلدىك ىزدەگەن ازاماتتاردىڭ ارىز -شاعىمى قارالدى ما؟ سوت جۇيەسىنىڭ بۇگىنى قانداي، كەشە قالاي بولدى؟ وسى جانە باسقا دا اتالعان ساۋالدارعا بايلانىستى  جوعارى سوتتىڭ باسپا ءسوز حاتشىسى ايدوس سادۋاقاسوۆتى سوزگە تارتقان بولاتىنبىز. باسپا ءسوز حاتشىسى بىزگە ءبىراز ماعلۇماتتار بەرىپ، سونىمەن قاتار دەرەكتەرگە تولى ينفوگرافيالىق روليكتى جاريالاۋدى ءوتىندى.

سونىمەن سوت سالاسىندا قانداي وزگەرىستەر بار؟

سوت جۇيەسىندە سوڭعى سوڭعى جىلدارى ءبىرقاتار جاڭاشىلدىقتاردىڭ ىسكە اسقانى ءمالىم. ولار تۋرالى بۇدان بۇرىن دا ايتقان بولاتىنبىز. ەلباسى مەن پرەزيدەنتتىڭ تاپسىرمالارىنا سايكەس سۋديالىق كادرلار قۇرامىن جاقسارتۋعا، سوت شەشىمدەرىنىڭ ساپاسىن ارتتىرۋعا جانە ءبىرىڭعاي سوت پراكتيكاسىن قالىپتاستىرۋعا زور كوڭىل بولىنۋدە.

سيفرلار – ارتىق اڭگىمەنى قاجەت ەتپەيدى، سوندىقتان رەفورمانىڭ ناتيجەسىن ينفوگرافيكا ارقىلى بەرىپ وتىرمىز.

ارينە، ەڭ باستى ماقسات – ادىلدىك ىزدەگەن ادامدارعا كومەكتەسۋ، ولاردىڭ قۇقىقتارى مەن زاڭدى مۇددەلەرىن قورعاۋ. دەرەكتەردى تالداۋ ناتيجەسى سوت جۇيەسى مەن قۇقىق قورعاۋ ورگاندارىنىڭ قىزمەتىنە، سۋديالار مەن سوت پروسەستەرىنە قاتىسۋشىلاردىڭ ساناسىنا وڭ وزگەرىستەر الىپ كەلگەنىن كورسەتەدى.

ەكى فراگمەنتتى عانا مىسالعا كەلتىرە كەتەيىن:

9 اي ىشىندە رەسپۋبليكا سوتتارىنا كەلىپ تۇسكەن قىلمىستىق ىستەردىڭ سانى 2015-2018 جىلداردىڭ ۇقساس كەزەڭىمەن سالىستىرعاندا 24%-عا ازايعان. بۇعان اقتاۋ ۇكىمدەرىنىڭ كوپتەپ شىعارىلۋى ىقپال ەتتى. تەرگەۋشىلەر دالەلدەۋ جاعى كەمشىن بولسا، سۋديالاردىڭ ايىپتاۋشىلاردى اقتايتىنىن بىلگەندىكتەن، ءوز جۇمىستارىنا مۇقيات قاراي باستادى. سوتتار ادامداردى قاماۋعا الۋعا، مۇلىكتەرىنە تىيىم سالۋعا سانكسيا بەرۋدەن باس تارتىپ، تۇرعىنداردىڭ تەرگەۋ ورگاندارىنا شاعىمدارىن قاناعاتتاندىرۋدا. وسىلايشا، تەرگەۋ ساتىسىندا ازاماتتاردىڭ قۇقىقتارىن قورعاۋعا ايرىقشا ءمان بەرىلۋدە.

2015-2018 جىلداردىڭ ۇقساس كەزەڭىمەن سالىستىرعاندا وتكەن 9 اي ىشىندە سوتتارعا ازاماتتىق ىستەر 32%-عا كەم ءتۇستى. مۇنداي كورسەتكىشكە تاتۋلاستىرۋ راسىمدەرىن كەڭىنەن قولدانۋ ارقىلى قول جەتكىزۋ مۇمكىن بولدى.