ەلىمىزدە جىل باسىنان بەرى ەسىرتكى زاتتارىن جارنامالايتىن 5 مىڭ سايت بۇعاتتالدى،  – دەپ Qamshy.kz اقپارات اگەنتتىگى حابارلايدى.

"ەسىرتكىنى زامانعا ساي ادىستەرمەن تاراتۋ كوزى رەتىندە وتكىزۋشىلەر ينتەرنەت-تەحنولوگيالاردىڭ بارلىق الەۋەتىن پايدالانۋدا. سايتتار مەن الەۋمەتتىك جەلىلەر، ينستاگرام، تەلەگرام، فەيسبۋك، سونىمەن بىرگە كيۆي-اميان، ياندەكس ولاردىڭ قۇرالىنا اينالعان. جىل باسىنان بەرى ءىىم 5 مىڭ سايتتى انىقتالىپ، ولار بۇعاتتالدى.

حالىقتىڭ، ۇكىمەتتىك ەمەس ۇيىمداردىڭ وكىلدەرىنىڭ قاتىسۋىمەن ەسىرتكى ساتىلاتىن سايتتارعا سىلتەمە جاسايتىن مىڭنان اسا گرافيتي-سۋرەت جويىلدى"، – دەدى ق ر ءىىم ەسىرتكى قىلمىسىنا قارسى ءىس-قيمىل دەپارتامەنتىنىڭ باستىعى تىلەگەن ماتكەنوۆ ۆەدومستۆودا وتكەن باسپا ءسوز ءماسليحاتىندا.

دەپارتامەنت باسشىسىنىڭ مالىمدەۋىنشە، رەسپۋبليكاداعى ەسىرتكىگە قاتىستى احۋالعا اۋقىمدى دەڭگەيدە شۋداعى شيكىزاتتىق بازا اسەر ەتەدى.

"ەسىرتكىنىڭ ەلدىڭ اۋماعىنداعى تارالۋىنا جول بەرمەۋ ءۇشىن ءبىز جىل سايىن "كوكنار" وپەراسياسىن وتكىزەمىز. بيىل وپەراسيا بارىسىندا 898 ەسىرتكىگە قاتىستى قىلمىس انىقتالدى. ونىڭ 411ء-ى وتكىزۋمەن بايلانىستى بولسا، 156 جاعدايى اسا ءىرى كولەمدە ساقتاۋمەن بايلانىستى بولعان. 17 توننا ەسىرتكى تۇرلەرى تاركىلەندى"،– دەپ دەپارتامەنت باسشىسى ءسوزىن تۇيىندەدى.

ەسكە سالساق، بۇعان دەيىن تىلەگەن ماتكەنوۆ ەسىرتكىمەن اينالىسقان 5 قىلمىستىق توپتىڭ ارەكەتىنە شەكتەۋ قويىلعانىن ايتتى.