باقتيار يبرايەۆ – اۋعانستاندا بىرنەشە جىل سوعىسىپ، كەيىن سيريادا سنايپەر بولعان قازاقستان ازاماتى. تەرروريستىك ۇيىمنىڭ قاتارىندا بولعان ول ەلگە ورالعان سوڭ مەملەكەتتەن كەشىرىم سۇرادى. بۇل تۋرالى ">Adil ukim YouTube-ارناسىنا بەرگەن سۇحباتىندا ايتتى.

باقتيار –  بەس بالانىڭ اكەسى. نۇر-سۇلتاندا تۋىپ-وسكەن. جوعارى ءبىلىمى بار. مەكتەپتەن كەيىن دىنگە بەتبۇرىپ، مەشىتكە بارا باستاعان.

"باسىندا ناماز وقىمادىم، ارتەمنىڭ قاسىنداعى مەشىتكە بارىپ، حاديس تىڭداپ ءجۇردىم. مەشىتتە جۇرگەندە بايقاعانىم، جاستاردىڭ كوبى نامازدى ءسال باسقاشا وقيدى. "ۋاحابشىلار" دەيدى عوي، سولار بولىپ شىقتى. ناماز وقۋ كەرەك، ايەلدەر جابىلۋ كەرەك دەيدى. مەن دە ءوزىمدى سولاي ەلەستەتىپ، سونداي جەر ىزدەدىم. ول جەرگە بارعان سوڭ  نەشە ءتۇرلى جاماعاتتاردى  كوردىك. سول جاماعاتتىڭ بىرەۋىنە ءوزىم دە كىردىم. اقيدالارى، تۇسىنىكتەرى باسقاشا بولىپ شىقتى. ولار – سۋفيستەر بولىپ شىقتى. كىم ءولىم ىزدەدى، مەن شاھيد بولامىن، ءجانناتقا بارامىن دەگەندەردىڭ بارلىعى بولدى"، – دەيدى ول.

باقتيار پاتەرلەردە وتكەنن ءتۇرلى جينالىستارعا ۇنەمى قاتىسىپ جۇرگەن. وندا جينالعاندار بيلىككە قارسى شىققان. ولار حاليفاتتى – مەملەكەتتىكتىڭ جالعىز فورماسى، شاريعاتتى – جالعىز زاڭ نورماسى رەتىندە قاراستىرعان. وسىلايشا، ولاردىڭ ىقپالىمەن 2011 جىلى اۋعانستانعا كوشەدى. كەيىننەن ۆازيريستاندا "يسلام جيھادىنىڭ وداعى" قوزعالىسىنا قوسىلادى. ودان كەيىن اۋعان مودجاحەدتەرىنىڭ قاتارىندا 4 جىل بويى سوعىسقان.

وسى  ۋاقىت ارالىعىندا  جارى حادجاب كيگەن، ءبىراق بالالارى مەدرەسەگە بارماعان. ويتكەنى، يبرايەۆ مەدرەسەدە پەدوفيلدەر كوپ بولدى دەگەن تۇسىنىكتە بولعان.

دايش (قازاقستاندا تىيىم سالىنعان) "يسلام مەملەكەتىن" قۇراتىنىن حابارلاعان كەزدە ول وتباسىمەن بىرگە سيرياعا كوشەدى. ودان كەيىن راككا قالاسىندا 8 اي تۇرادى.

سونداي-اق سۇحبات بارىسىندا يبرايەۆ سوعىستا ءجۇرىپ ءتۇرلى قارۋ ۇستاعانىن ايتتى. ءوزىنىڭ سوزىنشە، دايش قۇرامىنا ول سنايپەر رەتىندە قوسىلعان.

"كالاشنيكوۆ اۆتوماتى بولدى باسىندا. كەيىن م16 قارۋىن ۇستادىم. كوزدەۋىشى بولاتىن، تۇنگى كورۋ قۇرىلعىلارىن قوسۋعا بولادى"، – دەيدى.

2017 جىلى اقش پەن ونىڭ وداقتاستارى سودىرلارعا شابۋىلداي باستاعان. سول كەزدە يبرايەۆتىڭ ۇلى جارىقشاقتان جاراقات الىپ، باقتياردىڭ ءوزى كۇردتەردىڭ قولىنا تۇتقىنعا تۇسكەن.

"تانىس وتباسىلار بولدى، ولار مينادان جارىلىپ كەتتى. سونداي-اق بارلىق اۋدانعا بومبالار تۇسە باستادى. سونىڭ ار جاعىندا يران اسكەرى تۇردى. ءبىراق امەريكالىقتارعا جاقىنداتپايتىن. ايەلدەردى پالاتا قالاشىعىنا، ءبىزدى تۇرمەگە الىپ كەتتى"، – دەيدى ول.

باقتيار يبرايەۆ –  "جۋسان" ارنايى وپەراسياسىمەن ەلگە سيريادان قايتارىلعانداردىڭ ءبىرى. وعان "تەرروريستىك توپتىڭ ارەكەتىنە قاتىسۋ" جانە "تەرروريستىك ارەكەت ۇيىمداستىرۋ ماقساتىندا ادام جيناۋ" بويىنشا ايىپ تاعىلدى.

"اكە-شەشەمنەن عانا ەمەس، ۇكىمەتتەن دە كەشىرىم سۇراعىم كەلەدى. سەبەبى، مەن قازاقستان ازاماتىمىن. وڭباي، قاتەلەستىك. بالا-شاعامنىڭ ەگەر بىرەۋى قازا تاپسا، ءوزىمدى كەشىرە الماۋشى ەدىم"،  – دەپ وكىنەدى يبرايەۆ.