قازاقستان پرەزيدەنتى فورۋمنىڭ مەملەكەتتەر اراسىنداعى ءوزارا ىقپالداستىقتى دامىتۋعا باعىتتالعان يگى داستۇرگە جانە تولىققاندى مەحانيزمگە اينالعانىن، وتكەن جىلدارداعى ىنتىماقتاستىقتىڭ ناتيجەسى وسىنىڭ ايقىن دالەلى ەكەنىن اتاپ ءوتتى.

– ءوزارا ساۋدا-ينۆەستيسيالىق ىقپالداستىعىمىز ايتارلىقتاي كەڭەيدى. 2003-2018 جىلدار ارالىعىندا ساۋدا كولەمى 3،5 ەسە ۇلعايدى. 2018 جىلى تاۋار اينالىمى 6،5 تريلليون تەڭگەدەن استى نەمەسە 19 ميلليارد اقش دوللارىنا جەتتى، – دەدى مەملەكەت باسشىسى.

قازاقستان پرەزيدەنتى شەكارا ماڭىنداعى وڭىرلەردىڭ ينفراقۇرىلىمدىق الەۋەتىن نىعايتۋعا مۇمكىندىك بەرەتىن شەكارا ماڭى ىنتىماقتاستىعىنىڭ باعدارلاماسىن ازىرلەۋدى ۇسىندى.

– شەكارا ماڭى ايماقتارىنىڭ ينفراقۇرىلىمدىق الەۋەتىن كەڭەيتۋ جانە دامىتۋ قاجەت. قولدانىستاعى ينفراقۇرىلىم زاماناۋي تالاپتارعا ساي كەلمەيدى. سوندىقتان الدىمىزدا اۋقىمدى جۇمىس بار. قۇرىلعان ترانسۇلتتىق دالىزدەردى، سونىڭ ىشىندە «ءبىر بەلدەۋ، ءبىر جول» جانە «سولتۇستىك – وڭتۇستىك» مەگاجوبالارىن ەسكەرە وتىرىپ، شەكارالىق وتكىزۋ بەكەتتەرىن جاڭعىرتۋ كەرەك. بۇگىندە وتكىزۋ بەكەتتەرىن كەڭەيتىپ، قوسىمشا بىرنەشەۋىن اشۋ قاجەتتىگى تۋىنداپ وتىر، – دەدى قاسىم-جومارت توقايەۆ.

قاسىم-جومارت توقايەۆ سپورت سالاسىنداعى ىنتىماقتاستىق باعدارلاماسىن ازىرلەۋدى، سونداي-اق، قازاقستان استاناسىندا باۋمان اتىنداعى ۋنيۆەرسيتەتتىڭ بازاسىندا فيزيكا-ماتەماتيكا مەكتەبىن اشۋ جونىندەگى باستامانى قولدادى. سايكەسىنشە، رەسەيدىڭ شەكارالاس ايماقتارىنىڭ بىرىندە «نازاربايەۆ زياتكەرلىك مەكتەبىنىڭ» فيليالىن اشۋعا بولادى دەپ سانايدى.

قاسىم-جومارت توقايەۆ ءسوزىنىڭ سوڭىندا ەكولوگيالىق پروبلەمالاردى شەشۋدىڭ ماڭىزدىلىعىن ايتا كەلە، كەلەسى ءوڭىرارالىق فورۋمدى 2020 جىلى كوكشەتاۋ قالاسىندا وتكىزۋدى، سونداي-اق، ونىڭ تاقىرىبىن «ەكولوگيا جانە جاسىل ءوسىم سالاسىنداعى ىنتىماقتاستىق» دەپ اتاۋدى ۇسىندى.

فورۋم قورىتىندىسى بويىنشا مىناداي قۇجاتتارعا قول قويىلدى:

– «قازاقستان-رەسەي» شەكارا ماڭى ىنتىماقتاستىعى باعدارلاماسىنىڭ تۇجىرىمداماسى؛

– قازاقستان رەسپۋبليكاسىنىڭ مادەنيەت جانە سپورت مينيسترلىگى مەن رەسەي فەدەراسياسىنىڭ مادەنيەت مينيسترلىگى اراسىنداعى 2020-2022 جىلدارعا ارنالعان ىنتىماقتاستىق باعدارلاماسى؛

– قازاقستان رەسپۋبليكاسىنىڭ يندۋستريا جانە ينفراقۇرىلىمدىق دامۋ مينيسترلىگى مەن رەسەي فەدەراسياسىنىڭ كولىك مينيسترلىگى اراسىنداعى قازاقستان-رەسەي شەكاراسىنداعى وتكىزۋ بەكەتتەرىنىڭ جۇمىسى جونىندەگى بىرلەسكەن ءىس-قيمىل باعدارلاماسى؛

– قازاقستان رەسپۋبليكاسىنىڭ اقپارات جانە قوعامدىق دامۋ مينيسترلىگى مەن رەسەي فەدەراسياسىنىڭ جاستار ءىسى جونىندەگى فەدەرالدىق اگەنتتىگى اراسىنداعى جاستار ساياساتى سالاسىنداعى ءوزارا تۇسىنىستىك تۋرالى مەموراندۋم؛

– قوستاناي وبلىسىنىڭ اكىمدىگى مەن چەليابى وبلىسىنىڭ ۇكىمەتى اراسىنداعى ساۋدا-ەكونوميكالىق، عىلىمي-تەحنيكالىق، الەۋمەتتىك، مادەني جانە گۋمانيتارلىق ىنتىماقتاستىق تۋرالى كەلىسىم؛

– پاۆلودار وبلىسىنىڭ اكىمدىگى مەن قورعان وبلىسىنىڭ ۇكىمەتى اراسىنداعى ساۋدا-ەكونوميكالىق، عىلىمي-تەحنيكالىق، گۋمانيتارلىق جانە وزگە دە سالالارداعى ىنتىماقتاستىق تۋرالى كەلىسىم؛

– قازاقستان رەسپۋبليكاسى پاۆلودار وبلىسىنىڭ اكىمدىگى مەن رەسەي فەدەراسياسى ءنوۆوسىبىر وبلىسىنىڭ اكىمشىلىگى اراسىنداعى 2019-2021 جىلدارعا ارنالعان ساۋدا-ەكونوميكالىق، الەۋمەتتىك، عىلىمي-تەحنيكالىق جانە مادەني ىنتىماقتاستىق تۋرالى كەلىسىمدى ىسكە اسىرۋ جونىندەگى ءىس-شارالار جوسپارى؛

– «دامۋ» كاسىپكەرلىكتى دامىتۋ قورى» اكسيونەرلىك قوعامى مەن «رەسەيدىڭ شاعىن جانە ورتا كاسىپكەرلىكتى قولداۋ بانكى» اكسيونەرلىك قوعامى اراسىنداعى ىنتىماقتاستىق تۋرالى كەلىسىم.