وڭتۇستىك كورەيادا 7 جاسار بالانى كولىكپەن ۇرعان قازاقستاندىق جىگىتتىڭ اناسى زارداپ شەككەن بالانىڭ وتباسىنان جانە وڭتۇستىك كورەيا حالقىنان كەشىرىم سۇرادى دەپ جازادى Qamshy.kz اقپارات اگەنتتىگى "حابار 24" سايتىنىڭ دەرەگىن نەگىزگە الىپ. قازاقستاندىق ايەلدىڭ وڭتۇستىك كورەيالىقتارعا ۇندەۋىن جەرگىلىكتى "JTBC NEWS" ارناسى كورسەتتى.
"مەن، قازاقستان ازاماتى، كورەيا رەسپۋبليكاسىنا مەنىڭ اتىمنان جانە ۇلىمنىڭ اتىنان كەشىرىم سۇراۋ ءۇشىن كەلدىم. مەن باسىمدى ءيىپ وتىرىپ، كورەي حالقىنان وسى ەلدە بولعان جول-كولىك وقيعاسى ءۇشىن، اپاتتان زارداپ شەككەن بالا ءۇشىن كەشىرىم سۇرايمىن.بۇل ەكى ەل اراسىنداعى ماسەلە بولعاندىقتان، ءبىز كەشىرىم سۇراۋعا ەرتەرەك كەلە المادىق. مەنىڭ بالام قاتەلىگى ءۇشىن زاڭ الدىندا جاۋاپ بەرەدى. مەن بارلىق ادامداردان بالانىڭ تەزىرەك ساۋىعىپ كەتۋىن سۇراپ دۇعا ەتۋدى سۇرايمىن. زارداپ شەككەن بالا مەن ونىڭ اتا-اناسىنان دا كەشىرىم سۇرايمىز. قۇرمەتتى زارداپ شەككەن بالانىڭ اتا-انالارى! مەن، انا رەتىندە، ءسىزدىڭ جاعدايىڭىزدى تۇسىنەمىن. جاعداي سىزگە قاتتى اسەر ەتتى. مەن ءسىزدىڭ ۇلىڭىز ءۇشىن دۇعا ەتەمىن. ءبىز ءسىزدىڭ بالاڭىزعا الداعى وپەراسيادا كومەكتەسۋگە دايىنبىز. ەگەر اعزانى ترانسپلانتاسيالاۋ قاجەت بولسا، مەنىڭ ۇلىم جانە مەن اعزامدى بەرۋگە دايىنبىز. بالاعا كومەكتەسكەن بارلىق كورەيالىق دارىگەرلەرگە العىسىمىزدى بىلدىرەمىز"، - دەيدى قازاقستاندىق ايەل.
ەسكە سالساق، قىركۇيەك ايىنىڭ سوڭىندا وڭتۇستىك كورەيادا قازاقستاندىق 20 جاستاعى جىگىت 7 جاسار بالانى قاعىپ كەتكەن. بالا جان ساقتاۋ بولىمىنە ءتۇستى، 18 جەردەن سىنعان جانە باستان اۋىر جاراقات الىپتى. بۇل اپات وڭتۇستىك كورەيادا ۇلكەن رەزونانس تۋدىردى. سەبەبى قازاقستاندىق جىگىت كورەيادا زاڭسىز جۇرگەن، كولىك جۇرگىزۋشى كۋالىگى بولماعان جانە وقيعا ورنىنان ءىزىن سۋىتىپ، ەلدەن قاشىپ كەتكەن. كەيىننەن جاس جىگىت پاۆلوداردان تابىلىپ، سوت تورەلىگىن قاراۋ ءۇشىن وڭتۇستىك كورەياعا جىبەرىلدى. ول بەس جىلعا دەيىن باس بوستاندىعىنان ايىرىلۋى مۇمكىن. قىلمىسكەردى جازالاۋ تۋرالى پرەزيدەنت مۋن چجە ينگە جولداعان پەتيسياعا 60 مىڭعا جۋىق ادام قول قويعان.
پىكىر قالدىرۋ