ماڭعىستاۋ وبلىسىنىڭ مۇنايلى اۋدانىنداعى پەريناتالدىق ورتالىقتا ارنايى اپپاراتقا قوسىلعان ءسابيدىڭ مۇرنى ءبىر ءتۇن ىشىندە ءشىرىپ ءتۇسىپ قالدى – دەپ Qamshy.kz اقپارات اگەنتتىگىحابارلايدى، كتك تەلەارناسىنا سىلتەمە جاساپ.

"شالا تۋىلسا دا، ءبىر ايداي بالام ساپ-ساۋ بولدى"، – دەيدى اناسى. ول نارەستە جانساقتاۋ بولىمىندەگى اپپاراتقا قوسىلعان سوڭ وسىنداي جاعدايعا جەتتى دەگەن سەنىمدە.

"مەدبيكەلەرگە ءبىر كۇن بۇرىن "قاراڭىز، مىناۋ جارا بوپ جاتىر" دەپ ايتقانمىن. "ەشتەڭە بولمايدى" دەپ، ەكى مەدبيكە قارامادى. بۇل سول كۇنى تۇندە بولعان جاعداي. دارىگەرلەر، مەدبيكەلەر كىنالى. مەن ادىلدىك ورناعانىن قالايمىن. بالامنىڭ ومىرىمەن وينادى. ءسابيدى قانشا قينادى"، – دەيدى نارەستەنىڭ اناسى باقىت بەكنازاروۆا.

مۇرىنسىز قالعان شاقالاق ءتورت ايدان بەرى جانساقتاۋ بولىمىندە جاتىر. سودان بەرى اناسى وبلىس پەن ەلورداعا شاعىمدى قارشا بوراتۋدا.

پەريناتالدىق ورتالىقتى تەكسەرگەن وبلىستىق دەنساۋلىق ساقتاۋ باسقارماسى جاساندى تىنىس اپپاراتىنىڭ مۇرىندى قاجاپ، سودان ءسابيدىڭ نازىك تەرىسىندە جارا پايدا بولعانىن جانە بىردەن مۇرىن نەكروزىنا ۇشىراعانىن انىقتاعان.

بالا جاتقان بولىمشەنىڭ كەزەكشى دارىگەرلەرى مەن مەدبيكەلەرىنە تۇگەل سوگىس تە بەرىپتى. از ۋاقىتتا ەكى رەت وتا جاساتقان نارەستەنىڭ اناسى ەندى مورالدىق شىعىن رەتىندە ورتالىقتان 10 ميلليون تەڭگە تالاپ ەتىپ، سوتقا بەردى.

ال پەريناتالدىق ورتالىق "بالەنىڭ ءبارى ءسابيدىڭ اناسى مەن سيرەك كەزدەسەتىن اۋرۋدا" دەپ اقتالىپ وتىر.

"بالانىڭ اناسى قاۋىن مەن گازدالعان سۋسىن ءىشىپ، نارەستەسىن ەمىزگەن. سودان ىشەك اۋرۋى قوزىپ، ءسابي جانساقتاۋ بولىمىنە ءتۇستى. اعزاسى السىرەگەن بالادا بەت تىندەرىن بۇزاتىن "نوما" دەگەن سيرەك اۋرۋ پايدا بولعان. مۇنداي دياگنوزدى الماتى مەن نۇر-سۇلتاننان ارنايى كەلگەن ەكى حيرۋرگ تا راستاپ وتىر. ايتپەسە، قانشا نارەستە اپاراتتا جاتىر عوي. بارلىعى ساپ-ساۋ"، – دەدى ماڭعىستاۋ وبلىستىق پەرينيتالدىق ورتالىعىنىڭ ءبولىم مەڭگەرۋشىسى ءاليا تاسىروۆا.